ФИТР и Министерството за локална самоуправа потпишаа меморандум за меѓусебна соработка што ќе овозможи реализација на ваучерската програма за градење на капацитетите на претпријатијата во Република Северна Македонија. Соработката ќе се оствари преку Регионалните бизнис центри во рамки на Центрите за развој на планските региони.
Заедно со швајцарската Влада преку проектот „Одржлив и инклузивен рамномерен регионален развој”, Министерството за локална самоуправа обезбедува 3 милиони денари или 51 отсто, а Фондот за иновации другите 49 проценти од средствата за финансиска поддршка наменета исклучиво за ваучерската програма за градење на капацитетите на претпријатијата во земјава.
ФИТР останува посветен партнер на македонските компании.
На овој начин продолжуваме заедно со бизнис секторот да генерираме нови инвестициски циклуси и забрзан економски раст базиран на иновации и технолошки развој, како и зголемен број на вработувања. Целта на денешната соработка е да ги приближиме инструментите на Фондот и можностите за финансиска поддршка кои државата ги нуди на домашните компании низ целата земја. Со ваков пристап на децентрализирана поддршка и информации сакаме да ги поттикнеме компаниите во сите плански региони, а не само од скопскиот, да аплицираат во Фондот и нивните бизнис идеи заедно да ги претвориме во успешни проекти.
