Европската комисија бара Србија да ги повлече воведените прелевмани за увоз на млеко и млечни производи, се вели во писмото упатено до премиерката на Србија, Ана Брнабиќ, потврдено е за N1 од Европската комисија.
Како што пишува N1, Европската комисија испратила писмо до Ана Брнабиќ во кое изразила загриженост за различни трговски ограничувања кои Србија ги воведе во последните месеци, вклучувајќи ги неодамна воведените прелевмани – увозни такси – за млеко и млечни производи.
Имено, Србија не се консултирала со ЕУ пред да ги воведе прелевманите, па Европската комисија повикува на повлекување на тие рестриктивни мерки. „Србија не ги исполни своите обврски од Спогодбата за стабилизација и придружување со ЕУ, бидејќи не ја консултираше ЕУ пред воведувањето на тие мерки и не даде задоволително оправдување за нивното воведување“, потврдиле од Европската комисија.
Во писмото Србија се повикува да ги повлече воведените мерки и се укажува дека неоправдано се воведени нови трговски ограничувања се кршење на условите од Регулативата 1215/2009 и изменетата Регулатива 2020/2172. Владата на Србија на 17 февруари донесе одлука за воведување прелевман од 15 динари за литар млеко и 30 динари за килограм за седум видови сирења – ементалер, чедар, едам, тилсит, качкаваљ, масдам и гауда.
Земјоделците позитивно реагираа на воведувањето увозни такси кога станува збор за млекото, но сепак бараат воведување значително повисоки прелевмани за кашкавалот и тврдите сирења – десет пати повисоки од постоечките.
