Европската Унија со еден милион евра ќе го финансира подобрувањето на пазарот на месо во Србија, со цел да се поддржи воспоставувањето систем за класификација на говедски и свински трупови во согласност со заедничката земјоделска политика на ЕУ.
Експерти од Шпанија и Латвија кои ќе соработуваат со Министерството за земјоделство, шумарство и водостопанство на Србија ќе го спроведуваат овој проект во следните 18 месеци, соопштија од ресорното министерство.
Општата цел на проектот е да ги насочи производителите на месо кон барањата на пазарот и потрошувачите, како и да го подобри квалитетот на производството на месо и транспарентноста на пазарот на месо во Србија. Проектот би требало да резултира со воспоставување на задолжителен систем на класификација на говедски и свински трупови на линијата за колење и известување за нивните цени во согласност со регулативите на Европската Унија, како и примена на дефиниции, налепници и продажни етикети.
Помошникот министер за земјоделство и водач на проектот, Ненад Катаниќ објасни дека во текот на реализацијата на проектот ќе се работи на воспоставување систем за класификација на трупови во согласност со заедничката земјоделска политика на ЕУ, изготвување подзаконски акти и утврдување на националната формула за класификација на свински трупови на линијата за колење, соопшти Министерството.
Тој додаде дека активностите се однесуваат и на обука на класификаторите, контролното тело и надлежните инспекциски органи и воспоставување на системи потребни за спроведување на правилата и мерките за регулирање на пазарот.
Напишете коментар