Во време на типична пролет, младите лососи од мрестилиштето Нимбус источно од Сакраменто би се пуштале во реката, а потоа сами би допливувале во Тихиот Океан.
Но реките во Калифорнија и западниот брег на САД оваа година се погодени од екстремни суши и станале претопли за преживување на младите лососи.
Затоа работниците во рибниците оваа недела младите лососи ги натовариле во камиони со вода и ги пренеле во заливот на Сан Франциско за таму да ги пуштат во постуденото море, пренесува Ројтерс.
Малите количини на дожд и снег придонеле за помали нивоа на вода и повисоки температури на реките и резервоарите на тоа подрачје, рекол Џејсон Џулиен, кој управува со неколку државни рибници во речниот систем Сакраменто.
„Кога доаѓа до ваква ситуација, знаеме дека мораме да влеземе во поголема брзина и да направиме сè што можеме“, рекол Хери Морс, портпарол на калифорнискиот оддел за риби и диви животни.
„Оваа година државата планира со камион да пренесе 17 милиони лососи од различни рибници во заливското подрачје на Сан Франциско, што е итна процедура, која последен пат е спроведена за време на последната голема суша во 2014 година“, додал тој.
