Убавото време денеска ги раздвижи земјоделците, секој по своја работа, се сади, расадува, прихранува, се берат овошки…сезоната е во полн ек. На социјалните мрежи се гледа кој со што се занимава, се препознаваат амбициозните земјоделци, се гледаат трактори, полни гајби со овошје, непрегледни површини насадени со лубеници и пиперки…
Меѓу сите тие фотографии и директорот на Платежната агенција, Илија Стоилев во пчеларник – „Дружењето со пчелите и природата е незаменливо задоволство“ – вели тој.
Ни раскажа дека со пчеларство се занимаваат седум години, а ќерката е носителот на овој семеен бизнис.
-Со пчеларство почнавме пред седум години, со 5 пчелни сандаци, а сега стигнавме до 65. Активно се занимава мојата ќерка, таа е задолжена за цедење и пакување на медот, јас за тоа немам време. Корисници бевме и на мерката млад земјоделец пред пет години преку која набавивме касетна центрифуга електрична за 12 рамки, миксер, када и 40 сандаци, 30 нуклеуси, рамки, млин за шеќер, бушач за рамки, поленособирачи.. околу 7.000 евра – вели за Агротим, Стоилев.
Го прашавме каква е моменталната состојба во пчеларникот, во каква состојба се пчелите.
-Доцнат со развојот поради ладното време, дури сега почнаа да носат нектар. Роев нагон има кај речиси 90% и има многу работа во пчеларникот. Багремот измрзна, овошките измрзнаа останува само ливадата и драката и коелреутеријата кај нас, вели Стоилев.
Што се однесува до пласманот на медот, вели дека имаат решение од Агенцијата и храна и ветеринарство за продажба од куќен праг.
Што е она кое би сакале да го пренесете на колегите пчелари, а да не е темата субвенции?
-Никогаш да не ги напуштат пчелите, да се едуцираат да создаваат потомство кое ќе се занимава со пчеларство и постојано да се прилагодуваат на климатските промени – е пораката на директорот на АФПЗРР, Илија Стоилев.
