Директната поддршка во земјоделството преку редовните субвенции, дополнителните, средствата преку интервентниот фонд и други мерки на Владата, наидуваат на голем интерес од страна на земјоделците.
Токму затоа канцеларијата на Агротим е во постојан контакт со државните институции, особено со Платежната агенција за навремено да ги информираме земјоделците и агробизнисмените, а при тоа и да понудиме поддршка во изработка на соодветните апликации за одредени мерки или ИПАРД.
Најновите информации од директорот на АФПЗРР, Никица Бачовски се охрабрувачки и во тек со сите измени кои ги бараа земјоделските производители.
Имено, со новите мерки од интервентниот фонд државата ќе ги стимулира влезните трошоци во земјоделството и ќе субвенционира земјоделски производи предадени во преработувачки капацитети. Со усвоените измени на интервентниот фонд кои беа предложени од министерството, а беа усвоени од Владата, до крајот на годината ќе се стават во функција дополнителни 500 милиони денари – директна финансиска поддршка за земјоделците.
Овие финансиски средства засега се планирани за субвенционирање на набавка на вештачки ѓубрива, како и дополнителни субвенции по килограм за предадена зелка и слива, а според надлежните слична поддршка се подготвува и за млекопроизводителите.
Поддршката го опфаќа и винскиот сектор односно преработувачите на вино. Оваа државна интервенција за помош во земјоделството во овие кризни периоди треба да се реализира преку Платежната агенција.
Во разговор со директорот Никица Бачовски ги откривме деталите за она што ќе следува до крајот на годината.
“Службите на Агенцијата во периодот што следи ќе имаат полни раце со работа имплементирајќи ги мерките од директнте плаќања и интервентниот фонд. Во следниот период ќе се обработуваат и плаќаат субвенциите за предадено млеко и предадени градинарски и овошни култури за 2021 година. Дополнително, до крајот на годината Агенцијата ќе исплати дополнителни 3 денари за предадена зелка, 2 односно 4 денари за предадена слива, а ќе продолжи и финансирањето за набавка на вештачки ѓубрива за есенската сеидба” – потврди Бачовски.
Според информациите од Платежната агенција, многу наскоро ќе започне и распределбата на картичките за зелената нафта.
