Куманово ќе спроведе уште еден третман на дезинсекција против крлежи, информираа денеска од општината.
– На 25 и 26 август, годинава (четврток и петок) во 05:00 часот на територијата на Општина Куманово ќе се изврши дезинсекција против крлежи. Целта на третманот е спречување на ширење на заразни болести, каде како вектори се јавуваат истите, информираат од општината.
Со овој третман ќе бидат опфатени јавно-прометни зелени и цветни површини во градот, со акцент на зеленилото покрај градскиот кеј, плоштадот и парковите. Третираните површини ќе бидат видно одбележени и не се препорачува престој на површините како за луѓе, така и за животни, особено непосредно по извршувањето на третманот. Доколку временските услови не дозволат да се спроведе дезинсекцијата, тогаш ќе биде одложена за наредниот ден, за што граѓаните дополнително ќе бидат информирани.
Општина Куманово на почетокот од април, годинава избра на оператор за запрашување против инсекти, дезинсекција, дератизација против крлежи, лебарки и комарци, информираа од одделението за јавни набавки. Општината од буџетот одвои милион денари без вклучен данок на додадена вредност за вршење на оваа дејност. На јавниот оглас од тројцата заинтересирани оператори, беше избран операторот „Плант Медика“ од Куманово.
