Денеска во 17 часот, во Домот на Културата во Кавадарци ќе се одржи трибина на која ќе се презентираат новите измени на законот за вино и новите правилници за работа на малите семејни винарии.
Регистрирање на семејните винарии, правилата, потесните услови и обврски коишто произлегуваат со регистрирањето…се дел од темите на кои ќе се дебатира.
На трибината учество ќе земат министерот за земјоделство, Трајан Димковски и директорот на Државниот инспекторат за земјоделство, Зоран Шапуриќ.
Со измените и дополнувањата на Законот за вино ќе се создадат услови за развој на малите семејни винарници, ќе се воведат нови вински производи, што ќе придонесе и за поголеми приходи за винарските визби и за лозарите, поголем извоз на вино и девизен прилив.Измените се усогласени со европските регулативи со сите засегнати страни.
Дел од измените се однесуваат на воведување на нови вински производи како органско вино и ароматизирано вино, особено е интерес за малите винарници односно за зголемување на производството на вино кај малите винарници.
Во измените на законот за малите винарници нема да е потребно вработување на енолог, туку ангажирање со соодветен договор, тоа е едно барањата на лозарите кои МЗШВ ги прифати. Кај физичките лица, тие не мора да бидат со високо образование како што беше досега, може да имаат средно земјоделско училиште. Со низа на измени во Законот за вино, Владата го поттикнува производството, малите винарници, физичките лица кои може да произведуваат и да продаваат, а со тоа ќе се зголеми целокупното производство и извозот.
