Поради невообичаено топлата зима, природата во Хрватска почнала да се буди веќе на почетокот на јануари. Заедно со вегетацијата почнале да се будат и пчелите, што може да биде исклучително опасно. Доколку дојде до подолг студен период, може да дојде до изумирање на пчелите.
Пролетните температури среде зима прерано ги намамиле пчелите од кошниците. Цветовите на леските веќе внесуваат полен, па матиците многу порано почнале да несат јајца. Се ќе биде во ред доколку не настапи долготрајна студена зима.
-Ако настапи студ и потрае, пчелите ќе се собираат околу леглото бидејќи веќе го започнале. И тогаш може да се случи, ако трае студот, пчелите да се оддалечат од храната, доволно е 2 сантиметри да се оддалечат, и да умрат од глад – објаснува пчеларот Златко Миловац за HRT.
Она што можат да го направат пчеларите во тој случај за да спречат катастрофа е да постават пчелни колачи на рамките за да им ја доближат храната. И додека се уште не се знае што ќе донесе зимата, топлата есен веќе направи штета.
-Оваа година е посебна по тоа што есента беше многу долга, потоа дојде до реинвазија на вароата, што никој не го очекуваше – вели Миловац.
Пчеларите сега, за жал, пријавуваат големи загуби, во некои пчеларници умреле 50 до 70 проценти од пчелните заедници.
-Се уште не знаеме која е причината. Сите претпоставуваат дека се работи за вароа, која досега им нанесуваше штета на пчеларниците, но некои дури претпоставуваат дека е некој нов вирус кој се појавил и кој едноставно ја уништува оваа зимска пчела, изјави Вера Марушиќ, пчелар, член на Пчеларската задруга „Билогора – Бјеловар“.
На пчеларите и на овоштарите им останува само да се надеваат дека нема да има големи временски екстреми, бидејќи адаптацијата на климатските промени бара многу повеќе, пренесува HRT.
