Уште колку треба да чекаме за да сфатат и откупувачите и земјоделците дека само со Договорно производство и фер однос на двете страни ќе можат да опстанат и профитираат. Уште колку време да ги чекаме земјоделците да се здружат и заеднички да произведуваат и да не си прават сопки еден на друг оти така губат сите. Уште што треба да се случи и колку реколти да произведат без заработка само затоа што садат и сееат без претходно да знаат на кого ќе го продадат родот. Субвенциите се исплаќаат, министрите се менуваат, само земјоделците и откупувачите останаа исти. И граѓаните, нормално на кои им е смачено од поплаките на едните и другите додека на каса плаќаат најскапо.
Ќе ве почекаме уште некоја година и ќе ги гледаме статистичките податоци кои не ни одат во прилог. Или да напишеме оглас – Се молат сериозните компании да се јават да организираме Договорно производство за производи за кои имаат обезбедено пласман, преработка, откуп… „Без лага и превара“ – Откупувачите да плаќаат навреме, а земјоделците да не ја продаваат првата класа на пазар.
И бидејќи ова тешко сами да го решат, Министерството, односно ДИЗ ќе се јави како контролор за почитување на договорите. Зголемени субвенции за сите земјоделци што ќе влезат во проекти на Договорно производство, како мотив да се стават во систем и да почитуваат правила.
Да пробаме, ако се согласувате? Адресата ја знаете – АГРОТИМ.
Ленче Николовска
