Цените на пченицата повторно се зголемија над 380 евра/т по падот минатата недела, поради знаците за напредок во преговорите за прекин на огнот во Украина. За тоа придонесе стравот од глобалната криза за снабдување. Аналитичарите веруваат дека е можно брзо зголемување на цените на повеќе од 400 евра/т бидејќи проблемот со снабдувањето продолжува да се влошува, пренесува Agrarheute.
На европскиот пазар на фјучерси, цените на пченицата минатата недела завршија на 381,75 евра по тон, а новиот род беше котиран на 347,75 евра по тон, што е за 20 евра повеќе од претходната недела. Денес, највисоката сума е забележана на Чикашката берза (CME) и изнесува 394,81 евра/т.
Цената на пченката минатиот петок беше 338,75 евра, а новата реколта 296 евра за тон.
До ваков тренд доаѓа затоа што се повеќе заинтересирани страни на пазарот очекуваат војната во Украина да продолжи уште некое време. Аналитичарите во моментов проценуваат дека земјата најверојатно ќе може да извезе само 200.000 тони пченица од март до јуни. Постои страв кај трговците со житарки од последиците што ќе ги имаат воените штети врз логистиката и новата сеидба.
Новата украинска жетва на житарки во 2022 година се очекува да падне за 55 отсто на само 38,9 милиони тони. Извозот следната сезона би можел да падне од јули 2022 година до јуни 2023 година за околу една третина на 30 милиони тони, вклучувајќи 10 милиони тони помалку пченица и 19 милиони тони помалку пченка.
Извоз преку западната граница
Минатата недела, украинското Министерство за инфраструктура објави дека иако пристаништата на Црното и Азовското Море остануваат затворени, трговците ги пријавуваат првите пратки пченка што ќе бидат испорачани во Европа со железница. Украина најголемиот дел од своето жито го извезувала преку пристаништата на Црното Море, а месечниот извоз пред војната бил повеќе од 5 милиони тони.
Трговците и челниците во земјоделството објавија дека Украина сè уште има значителни количини житарки складирани од претходната жетва и сега се обидува да започне со извоз со возови преку нејзината западна граница.
Се проценува дека до 600.000 тони житарки месечно може да се извезат преку железницата во Европа, но се проценува дека само еден милион тони ќе ја напуштат земјата од март до крајот на маркетиншката годината кон крајот на јуни поради логистички проблеми.
Сушата во Канада, САД и Кина ги намалува приносите
Исто така, постојат стравувања од дополнителни загуби во производството поради временските услови во другите региони во светот. Во Канада земјоделците се соочуваат со суша, а причина за загриженост даваат и податоците од теренот.
Минатогодишната суша ги подигна цените на пролетната пченица богата со протеини на четиринаесетгодишен максимум на берзата во Минеаполис. Слична е ситуацијата во САД и Кина, бидејќи овие земји исто така се соочуваат со временски непогоди и недостаток на влага во почвата.
