Бугарските земјоделци бараат да се запре бесцаринскиот увоз на евтини украински житарки

Земјоделците во Бугарија, во северните региони Велико Трново, Русе и Плевен, организирале протест со барање да се запре бесцаринскиот увоз на евтини украински житарки, а предупредуваат и на проблеми со увозот на сончоглед. Тие излегле на улиците со повеќе од 50 трактори и комбајни и накратко го блокирале сообраќајот на магистралниот пат што го поврзува градот Русе со внатрешноста на земјата.

Велат дека домашната пченица не може да се натпреварува со увозот од Украина кој е поевтин за околу 30 отсто.

„Пазарот е пред колапс, силосите се полни“, изјави вчера координаторот на протестот Димитар Димитров за државната телевизија BNT, додавајќи дека слични проблеми предизвикал и увозот на поевтино семе од сончоглед од Украина.

Демонстрантите не одредиле до кога планираат да протестираат, а земјоделците од регионот Бургас на Црното Море се подготвени да им се придружат.

„Цените паднаа, пазарот пропадна. Има луѓе што не ја продадоа пченицата, земаа кредити за да ги покријат другите трошоци. Ние ги спроведуваме европските директиви, прскаме со ова, ѓубриме со тоа и на крајот – носат украински житарки и сончогледи и тоа е тоа. Зошто никој не размислува што јаде овој народ? Стратешкиот план го смислиле луѓе кои никогаш не биле на нива“, огорчен е земјоделецот Генчо Генчев од земјоделската задруга во с. Кривина.

Од друга страна, украинското Министерство за земјоделство на почетокот на февруари предупреди дека растот на извозот на семе од сончоглед, наместо на масло, може да уништи еден од најпрофитабилните сектори во нивното земјоделство.

Бугарија во 2022 година извезла 2,75 милиони тони сончоглед, а пред руско-украинската војна извозот не надминувал 100.000 тони годишно. Според Министерството за земјоделство на Бугарија, 70 отсто од семето било извезено во ЕУ, а 20 отсто во Турција.

„Тоа би можело да доведе до затворање на погоните за масло, катастрофален пад на производството на сончогледово масло, губење на уделот на глобалните пазари на производи со висока додадена вредност, губење на работни места и пресметливи приходи, што е неприфатливо“, предупредија одгледувачите на сончоглед.

Во сезоната 2020/2021 извезле 5,3 милиони тони, а во 2021/2022 г извозот се намалил на 4,5 мил. тони сончогледово масло.