Бразилските земјоделци минатата година произвеле храна за 10% од светската популација, се наведува во студијата што во четвртокот ја објави државната агенција за земјоделство, „Ембрапа“.
Студијата се фокусирала на бразилското производство на житни култури и маслодајни семиња, бидејќи овие растенија се сметаат за основни за прехрана на луѓето и на домашните животни, објави „Ембрапа“. Овие податоци покажуваат дека Бразил, кој е увозник на храна со децении, станал светска велесила во земјоделско производство и најголем извозник во светот на производи како што се соја, говедско и пилешко, што ги извезува во Кина, во Европската Унија и во други земји.
Аналитичарите на „Ембрапа“ до резултатите дошле користејќи две методологии. Бразилскиот извоз на житарки по цените на меѓународниот пазар, според буџетот на Меѓународниот монетарен фонд, покажува дека Бразил нахранил 772,6 милиони од вкупно 7,76 милијарди луѓе ширум светот. Другата методологија заснована на физичкото производство на житни култури покажува малку помал број од 637 милиони луѓе, меѓу кои се и 212 милиони жители во Бразил, наведува „Ембрапа“.
