Бил Гејтс, еден од најбогатите луѓе на светот, е најголем сопственик на земјоделско земјиште во САД. Неодамна дојде до вртоглавата бројка од скоро 100.000 хектари обработлива земја во 18 сојузни држави.
Гејтс веќе со години се занимава со земјоделство, а неговата фондација од 2008 година учествува во програми поврзани со земјоделство. Уште од 2008 година Бил и Мелинда Гејтс објавија дека ќе дадат повеќе од 300 милиони долари за промоција на малите земјоделци во Африка и Азија. Нивната компанија вложува и во развој и ширење на „суперпосеви“ отпорни на климатски промени и во млечни крави кои произведуваат големи количини млеко.
На многумина им делува необично дека човекот кој стои позади една од најголемите технолошки фирми на светот е и најголем сопственик на земјоделско земјиште во САД. Токму поради тоа Гејтс е во центарот на вниманието на медиумите, а шпекулациите за неговите понатамошни планови се однесуваат најмногу на производство на нови ГМО култури, отпорни на климатските промени. Многумина и го обвинија Гејтс за агресивно промовирање на ГМО култури, на штета на традиционалните локални култури.
За што Гејтс ќе го искористи земјиштето, сè уште не се знае, иако многумина се надеваат дека ќе се користи во согласност со вредностите на нивната организација за одржливо и еколошко производство и слични цели, а не за промовирање на ГМО култури, пренесува „Јутарњи лист“.
