Со цел што повеќе да се прочисти воздухот, во Белград е поставено првото течно дрво, кое содржи шестотини литри вода и користи микроалги за врзување на јаглерод диоксид и производство на чист кислород со фотосинтеза.
Се работи за иновативен апарат чија цел е борба против загадениот воздух. Тоа е првиот урбан фото-биореактор во Србија, во кого тамошните власти гледаат решение за борба против емисиите на стакленички гасови и подобрување на квалитетот на воздухот. Содржи шестотини литри вода и користи микроалги за врзување на јаглерод диоксид и производство на чист кислород со фотосинтеза.
„Микроалгите заменуваат две десетгодишни стебла или 200 квадратни метри тревник. Предноста на овој апарат е што може да се инсталира за еден ден и не треба да чекате стотици години за да порасне“, изјави за медиумите Иван Спасојевиќ, еден од авторите на проектот од Институтот за мултидисциплинарни истражувања на Универзитетот во Белград. „Системот е ист бидејќи и дрвјата и тревата вршат фотосинтеза и го врзуваат јаглерод диоксидот“, додава тој.
Како што откри д-р Спасојевиќ, предноста на микроалгите е што тие се 10 до 50 пати поефикасни од дрвјата.
„Нашата цел не е да ги замениме шумите, туку со овој систем да ги пополниме тие урбани џебови каде што нема простор за садење дрвја“, тврди тој.
Белград е четвртиот најзагаден град во Србија, поради двете големи електрани на јаглен во близина.
