Додека на нашиот пазар доаѓаат првите домашни, црвени, сочни јагоди, деновиве можеме да прочитаме и за јапонските бели јагоди кои се продаваат од 10 до 20 долари по парче или во помали пакувања за 40 долари.
Тие се дел од таканареченото луксузно овошје во Јапонија, пишува indie88. Бели се одвнатре и однадвор. Се одгледуваат за да бидат поголеми, помеки и послатки од просечните јагоди. Има неколку видови, но најпосебен е White Jewel (Бел скапоцен камен), познат и како Shiroi Houseki.
Нивниот творец е Јасухито Тешима кој со години го вкрстува ова овошје за да ги добие посакуваните, бели јагоди.
Одгледувачите како Тешима ја намалуваат сончевата светлина кога растат јагодите, што го намалува нивото на антоцијани, пигмент кој им дава боја на овошјето и зеленчукот.
И покрај десетгодишното експериментирање и истражување, само околу 10 отсто од посевите се навистина целосно бели, додека останатите имаат црвени или розови делови.
Оние кои ги пробале, велат дека се навистина многу вкусни. Вкусот наводно се споредува со свеж ананас, а по неколку секунди е помалку „тропски“ и повеќе потсетува на бонбони.
Освен што е многу вложено во истражувањето на нивното одгледување и што приносот е многу низок, производителите цената ја оправдуваат со високите трошоци за енергија и потребното време.
Треба да се напомене дека White Jewel не е исто што и ананас-јагодите (Pineberry) кои се многу помали и имаат розови семиња.
