Премногу влага и висока температура на воздухот се идеални услови за развој на габата Colletotrichum fragariae. Симптомите се појавуваат на столоните и лисните дршки, прво во вид на ситни црни дамки, кои со тек на време се зголемуваат. Кога болеста ќе ја зафати столоната, делот над зафатеното место, доколку не е вкоренет, се суши.
Доколку е зафатена лисната дршка, лиската се суши и пропаѓа.
При поволни услови, топло време и влага, симптомите се јавуваат на плодовите. Светли или воденести дамки се јавуваат на плодовите кои дозреваат. Со тек на време дамките се зголемуваат, се спојуваат и целосно го зафаќаат плодот, кој подоцна се суши.
Симптомите се јавуваат и на чашкините ливчиња кои се сушат и пропаѓаат.
На листот се јавуваат тркалезни дамки со пречник 1-3 мм. Обично се црни, а понекогаш
светло-сиви.
Симптомите на антракноза често може да се помешаат со сиво гниење предизвикано од Botrytis cinerea. Сепак, постои разлика. Кај сивото гниење, на плодовите се појавува сивкаста обвивка со мицелиум, а кај антракноза, плодовите само поцрнуваат без мицелијална обвивка.
Сузбивањето на болеста се врши со агротехнички и хемиски мерки.
Агротехничките мерки вклучуваат: садење здрав саден материјал, засадување на поотпорни – потолерантни сорти на антракноза, плодоред (минимум три години, а се препорачува и петгодишен плодоред), умерено ѓубрење со азотни ѓубрива.
Антракнозата се пренесува со садниот материјал, па затоа садењето сертифициран, здрав саден материјал е основната превентивна мерка.
Мерките за хемиска заштита се доста тешки бидејќи габата брзо станува отпорна на фунгициди. Превентивно може да се третира со фунгициди на база на манкозеб, каптан, дифеноконазол + цифлуфенамид.
Третманот треба да се направи во почетните фази на развојот на болеста, додека дамките се уште се на дршките.
Добра заштитна мерка е третирањето на растенијата јагоди со препарати на база на бакар за време на зимското мирување.
За заштита од антракноза се препорачува и мулчирање со слама меѓу редовите
