Земјите во Јужна Европа поминуваат низ втор топлотен бран во последните две недели со температури кои едвај се издржуваат. Новиот антициклон Харон, кој го добил името по чамецот од грчката митологија кој превезува души во подземниот свет, предизвикува екстремни горештини и се очекува да трае најмалку до крајот на неделата.
Шпанската метеоролошка агенција Аемет објави дека топлотниот бран оваа недела „ќе зафати голем дел од земјите кои граничат со Медитеранот“. Температурите во јужните делови на земјата би можеле да се искачат над 42 степени Целзиусови, но најверојатно ќе почнат да опаѓаат во среда.
Грција се соочи со разорни шумски пожари кои се шират низ боровите шуми кои се суви поради жештините. Ветерот ги прошири пожарите во североисточна Атика, Лутраки, Девенорија и Боетија. Издадени се наредби за евакуација за најмалку шест градови долж брегот бидејќи ветровите достигнуваат брзина од 70 километри на час.
Во Италија, здравствените власти ги интензивираа предупредувањата за жештините, а Министерството за здравство побара од регионите да ги зголемат повиците до старите и ранливите лица за да не мора да излегуваат да бараат медицинска нега.
Предупредување стигна и во другите земји, вклучително и Франција, Германија и Полска, кои исто така би можеле да се соочат со екстремни горештини во следните неколку дена.
Светската метеоролошка организација предупреди дека со засилување на топлотниот бран на северната хемисфера оваа недела, ноќните температури ќе се зголемат што ќе доведе до зголемен ризик од срцев удар и смрт.
Експертите велат дека повеќе од 60.000 луѓе ширум Европа починале во минатогодишните топлотни бранови. Италија, Грција, Шпанија и Португалија биле најпогодените.
