Судот за меѓународна трговија во Њујорк ги прогласи за неважечки царините наметнати од американската влада, со кои претседателот Трамп ги надминал своите овластувања. Голем број мали американски компании поднесоа тужба.
Американски федерален суд го блокираше стапувањето во сила на царините на претседателот Доналд Трамп што тој ги најави на „Денот на ослободувањето“. Судот за меѓународна трговија со седиште во Менхетен пресуди дека Уставот на САД му дава ексклузивна моќ на Конгресот на САД да ја регулира трговијата со други земји. Овластувањата на американскиот претседател Трамп за итни интервенции за заштита на американската економија не можат да го анулираат тоа.
Претседателот ги надмина своите овластувања со воведување паушални царини за увоз од земји кои извезуваат повеќе во САД отколку што увезуваат, царините за кои станува збор ќе бидат „укинати, а нивната примена трајно ќе се забрани“, се вели во одлуката.
„Судот не ја оценува мудроста или веројатната ефективност на употребата на царините како средство за притисок од страна на претседателот. Воведувањето на царините е недозволиво не затоа што е немудро или неефикасна, туку затоа што федералниот закон не го дозволува тоа“, ја објаснија својата одлука тројцата сојузни судии.
Одлуката е горчлив пораз за американскиот претседател – но последниот збор веројатно сè уште не е кажан. Американската влада веднаш поднесе жалба на одлуката. Стивен Милер, заменик шеф на кабинетот на Белата куќа и еден од главните политички советници на Трамп, ја критикуваше одлуката на судот на социјалните мрежи, велејќи: „Судскиот пуч е целосно надвор од контрола“. По пресудата, американскиот долар порасна и во однос на швајцарскиот франк и во однос на јапонскиот јен. Вредноста на американските акции порасна на берзите, тие ликуваа.
Повод за пресудата беше тужбата која ја поднесе непартискиот Центар за правда Либерти во име на пет мали американски фирми. Фирмите увезуваат стоки од земјите погодени од новите царини на американскиот претседател. Претпријатијата, почнувајќи од увозник на вино и алкохолни пијалоци во Њујорк до производител на училишен прибор и музички инструменти со седиште во Вирџинија, велат дека царините ќе им наштетат на нивните деловни можности. Нивната тужба е еден од седумте правни процеси против царинската политика на Трамп, вклучително и од 13 американски држави и други групи помали фирми.
Извор: ДВ
