Гостин во најновото издание на поткастот „Бизнис-клуб“ со Бранко Азески е м-р Александар Манев, главен извршен директор на „Кроација осигурување“ АД, друштво за неживотно осигурување Скопје, и член на УО на Стопанската комора. Во поткастот се разговора за состојбите со осигурителниот сектор и со економијата во државата.
М-р Mанев својата кариера ја започнал како кредитен службеник во „НЛБ банка“ АД Скопје, во делот на корпоративното банкарство и на ритеил-банкарството. Потоа преминува на позицијата генерален директор во „Илирика фаунд менаџмент“ АД Скопје, каде што е одговорен за воведување општи политики и најдобри бизнис-практики и за изработка на макроекономски анализи, проекции и деловни планови.
Во периодот од 2012 до 2017 година работи во „Бизнис ритејл-енерџи сервисис“ Скопје и е одговорен за продажба на електрична енергија во деловните компании. Во 2016 година станува директор на „Идеја плус комуникејшн“ Скопје.
Поради своето значајно професионално искуство една година работи како надворешен советник во Кабинетот на потпретседателот за економија во Владата на Република Северна Македонија (2017 – 2018) и како член на извршната група одговорна за креирање економски мерки за привлекување директни странски инвестиции. Исто така, бил и надворешен експерт во Фондот за иновации и технолошки развој, за евалуација на користењето средства за компаниите апликанти на јавните повици за грантови.
Од 2020 година е главен извршен директор на „Кроација осигурување“ АД, друштво за неживотно осигурување Скопје. Како што истакнува, „Кроација осигурување“ значи фер пристап и доверба: „Од компанија која во 2020 година имаше приход од 6 милиони евра од премија, годинава ќе ја завршиме со приход од 20 милиони евра“, вели Манев. Тој нагласува дека најважни се квалитетот и луѓето во компанијата, а потоа бројките:
„Бројките се важни, но духот на една компанија го прават луѓето.“
Тој додава дека компанијата има цел и јасна визија, силен тим и стабилни финансии, а паралелно, чекор по чекор, воведува и дигитални технологии, со особено внимание на сајбер-ризиците.
Зборувајќи за својата компанија, Манев вели дека компанијата е на третото место според нето-полисираната премија, а на петтото според бруто-полисираната премија од вкупно 11 осигурителни компании. Дополнително нагласува дека се лидери во приватното здравствено осигурување и дека нудат најквалитетни услуги во овој сегмент.
Од 2018 година Манев е сопственик на „Фактор медиа груп“ Скопје, па така управува со една од најрелевантните и најпосетуваните медиумски групи во земјава (Faktor.mk – бизнис и економија, Zenskimagazin.mk – женски магазин и Maskimagazin.mk – машки магазин).
Запрашан за своето влијание во уредувачката политика, тој истакнува:
„Како и во секој бизнис така и во медиумите треба да се вработат најдобрите луѓе и да се остават самите да ја вршат својата работа.“
Покрај професионалниот ангажман, тој е претседател на асоцијацијата АЛУМНИ на Економскиот факултет при УКИМ Скопје. За Факултетот вели дека со новиот начин на работа и со свежите идеи на младите професори подготвен е за новите времиња и предизвици. Сепак, истакнува дека странските универзитети на кои се дообразувал – Универзитетот „Шефилд“ во Англија, „Сити колеџ“ во Солун, Школата за менаџмент во Блед, Словенија, и Универзитетот „Нортвестерн“ во САД (програма Келог за извршни директори) – имаат поинаков пристап: учење преку студии на случај, решавање проблемски ситуации и значајно учество на практичната настава.
Во поткастот Манев открива и дел од своите лични интереси – љубовта спрема планинарењето и читањето книги, особено од автори кои се успешни бизнисмени.
Стопанска комора
