Промената на времето која се случи во изминатите денови, со драстичен пад на дневните температури некаде и за повеќе од 10 Целзиусови степени со појава на врнежи од дожд кои беа повеќе од потребни во овој период после една голема зимска суша и појавата на снежна покривка особено во Пелагонија со дебелина од 20 – 27 сантиметри, се оценува како повеќе од добредојдена скоро за сите земјоделски култури.
Есенските посеви во изминатиот период беа во катастрофално лоша состојба поради недостатокот од влага во почвата во површинскиот слој од 5-10 сантиметри, а тоа е регијата каде се наоѓа кореновиот систем на посевите во овој момент, и неможноста да се изведи првото прихранување со азотни минерални ѓубриња, особено неповолна состојба имавме во Овче полскиот регион, кој за жал и со овој бран не ги доби потребните количества врнежи, но сепак и тие десетина литри ќе допринесат да се изведи прихранувањето со препорака што е можно поскоро заради фактот што таквата влажност во почвата не е задоволителна и постои можност во наредната седмица со покачувањето на дневните температури и стабилизацијата на времето и таа да се изгуби.
Сосотојбата во Битолскиот и Прилепскиот регион е далеку подобра, врнежите се околу 27 л/м2 а присуството и на снежната покривка со дебелина од околу 20 сантиметри дополнително ја одржува оваа состојба на задоволително ниво. Состојбата со снежните врнежи на планините влева барем малку надеж дека ќе се покачат нивоата на водотеците и ќе допринесат за подобрување на хидролошката состојба, а особено битна за земјоделството е полнењето на вештачките акумулации кои се на многу ниско ниво.
Дефицитот на влага во почвата и празните акумулации се провлекува подолг период скоро целата есен и зима до овој период и истиот во овој момент изнесува околу 50-90 л/м2 така да едни вакви врнежи не ја решаваат состојбата во земјоделството туку само моментално ја ублажуваат, состојба која кај земјоделците треба да влее надеж дека сеуште се не е изгубено и состојбите полека очекуваме да се стабилизираат.
Минималните температури забележани во текот на изминатата ноќ со вредности до -4 Целзиусови степени не се никаква закана или опасност за измрзнувања, но и оние кои се очекуваат во наредните денови до викендот со вредности до -14 Целзиусови степени во источните краеви и некаде околу -10 во Пелагонија и долж Повардарието не треба да ги загрижуваат земјоделците, заради тоа што сеуште не е отпочната вегетацијата кај овошките од коскестите видови, а нивната издржливост во услови на мирување е поголема.
Среќна околност во изминатиот период беше тоа што покрај забележаните високи дневни температури во текот на денот, имавме ноќни и утрински температури ниски кои ја разладуваа атмосферата а ниската влажност во почвата дополнително не дозволуваше нагло и брзо отпочнување на процесите за пролетно обновување на вегетацијата.
Како резиме, ваквата промена која ни се случи деновиве не е невообичаена за овој период од годината, туку напротив очекуваме да има позитивни импликации врз земјоделското производство со сите оценки дадени предходно.
Ангелко Ангелески
Агрометеоролог во Управата за хидрометеорoлошки работи Скопје
