По повод Светскиот ден на млекото, компанијата Бучен Козјак реализираше донација на средства наменети за реновирање на просториите на ЈЗУ Универзитетска клиника за пулмологија и алергологија, потврдувајќи ја својата долгогодишна посветеност кон унапредување на здравјето и благосостојбата на заедницата.
Договорот за донација денес го потпишаа директорката на Бучен Козјак, Наташа Бојковски Денковска, и д-р Оливер Зафировски, директор на ЈЗУ Универзитетска клиника за пулмологија и алергологија. Со оваа поддршка ќе се овозможи подобрување на условите во Клиниката, со што ќе се придонесе кон поквалитетна здравствена грижа за пациентите и подобри услови за работа на медицинскиот персонал.
По повод одбележувањето на Светскиот ден на млекото, од Бучен Козјак истакнуваат дека оваа донација е уште една потврда на нивната заложба за поддршка на иницијативи кои придонесуваат за подобро здравје и поквалитетен живот на граѓаните.
„Како компанија која повеќе од 40 години е посветена на производство на квалитетни млечни производи и промоција на здрави животни навики, веруваме дека грижата за здравјето не завршува со производот што го пласираме на пазарот. Нашата одговорност е да придонесуваме и кон зајакнување на здравствениот систем и подобрување на условите за лекување“, изјави Наташа Бојковски Денковска.
Од компанијата потенцираат дека општествената одговорност останува еден од клучните столбови на нивното работење и дека и во иднина ќе продолжат да инвестираат во проекти кои создаваат трајна вредност за заедницата.
Со оваа донација, Бучен Козјак уште еднаш ја потврдува својата улога како општествено одговорна компанија која преку конкретни активности придонесува за создавање поздрава и подобра иднина за сите.
Бучен Козјак
