Не само јавниот, туку и приватниот сектор треба активно да се вклучи во борбата против корупцијата. И невладините организации, исто така, науката, академиците, стопанските комори, граѓаните, на сите нивоа. Секој треба јавно да зборува и да кажува со какви конкретни примери на корупција се соочил. Неопходно е креирање заедничка платформа во која ќе учествуваат сите општествени чинители. Само така ќе може да се стори нешто конкретно, наспроти досегашните, главно декларативни заложби кои не дадоа голем резултат, порачаа учесниците на денешната конференција „Бизнис интегритет за конкурентна економија“.
Како што беше речено, бизнис интегритетот не е товар, туку предност, а посветеноста на транспарентноста ги прави малите и средните претпријатија многу поконкурентни и им дава многу поголема предност.
– Јавниот и приватниот сектор се меѓусебно поврзани, а нивната меѓусебна комуникација е клучна во борбата против корупцијата. Со подигнување на интегритетот во јавниот сектор, ќе се подигне интергитетот и во приватниот сектор. Корупцијата е двострана и без интегритетен првиватен сектор, нема интегритетен јавен сектор и обратно, истакна претседателот на Државната комисија за спречување на корупцијата, Адем Чучуљ.
Според претседателот на Стопанската комора, Бранко Азески, корупцијата е тема од која високите владини, па и бизнис претставници најчесто бегаат. Малите и средните претпријатија се соочуваат со овој проблем на шалтерите во институциите.
– Корупцијата се решава со формирање платформа во која ќе учествуваат сите. Јас не гледам дека во Македонија учествуваат сите. Ги нема клучните чинители – универзитетите, Академијата, невладиниот сектор,… Ако сите што седиме овде посочиме по еден пример до ДКСК, вклучувајќи ги Владата, приватниот и невладиниот сектор, ќе ја поттикнеме работата. Знаеме дека има превработеност во државната администрација, 150 000 луѓе најмалку. Тоа е основата за корупција. Ја повикувам ДКСК да види – има пет институции што немаат никаква задача, на пример, Агенција за регулирање на железничкиот сообраќај. За монополска позиција имаме агенција за регулирање. Што регулира? Изминатите 35 години самостојност сменивме 12 премиери, 18 министри за транспорт и за финансии, 15 министри за економија, 21 за екологија,… нови политики, методолгоии, закони, поравилнци и исе вртиме во круг. Кога ќе сфатиме и дали знаеме што е интегритет?, рече Азески.
Според него, проблемот со корупцијата не може да го реши ниту една влада, ниту една комора и ниту една комисија, туку народот.
– Треба да се направи платформа што ќе биде поддржана од цел народ, од сите институции. Ако првиот човек краде, сите крадат, но ако дојде некој чесен, нема никој да краде, заклучи Азески и уште еднаш апелира на потребата од намалување на бројот на вработените во јавната администрација.
На конференцијата учествуваше и вицепремиерот и министер за транспорт Александар Николоски кој напомена дека Македонија мора да ги заштитиме домашните компании.
Според него, нашите мали и средни фирми на отворен, либерален систем не се неконкурентни.
-Прашањето е дали сакаме да бидеме фини пред јавност, пред публика, во извештаи и да зборуваме за транспарентност, за отчетност или сакаме да ги гледаме работите какви што се, да се погледнеме во огледало и да признаеме дека имаме суштински проблеми кои треба да се решат доколку сакаме да ни преживее стопанството и доколку сакаме да не трпиме надворешни влијанија кои се надвор од стратешката ориентација на државата, подвлече Николоски.
Конференцијата беше организирана во рамки на ЕУ кофинансираниот проект „Бизнис со интегритет Северна Македонија – Мобилизирање на малите и средните претпријатија (МСП) како лидери против корупција“. Присуствуваа Павел Усватов, директор на Програмата за владеење на правото, КАС Југоисточна Европа, германската амбасадорка Петра Дрекслер, заменикот-шеф на Делегацијата на Европската Унија, Бен Нупнау, претседаталката на Асоцијацијата на бизнис жени Валентина Дисоска, како и финанскиот менаџер и офицер за усогласеност во Маркарт Македонија, Снежана Здравеска.
МИА
