Во изминатите денови имаше периоди на променливо облачно со сончеви периоди и топло време, со повремени локални врнежи од дожд на некои места.
Ова е период на интензивно расадување на тутунот, и на градинарски култури на отворено. Во наши услови, најдобри резултати во прилепскиот регион се постигнати кога тутунот се расадува во првата половина на мај. Тутунот е топлољубиво растение и во сите фази од својата вегетација бара релативно високи температури. Минималната температура за развиток е од 8°C до 10°C, оптимална 20°C до 30°C, а максималната меѓу 40°C до 50°C. На температура околу 0°C, доаѓа до загинување на растението, особено се тешки последиците од превисоки температури. Обезбеденоста на вода при садење на тутунот има важна улога заради подобро вкоренување. Кај виновата лоза во некои региони, веќе е во тек фазата на потерување на пупките и пораст на ластарите. Како најважен надворешен фактор за почеток на потерување на пупките е температурата и влажноста на воздухот. Температура од 10°C се смета за биолошка нула, поради тоа што на пониска температура не започнува оваа фенофаза. Во оваа фенофаза доаѓа до пораст на ластарите и развој на органите што се наоѓаат на нив: лисја, цветови и др. За време на траењетo на оваа фенофаза треба да се извршуваат повеќе агротехнички мерки како што се плевење (лачење), врзување и поткршување на ластарите, заштита против болести и штетници , уништување на плевелите и др. Оваа фенозфаза се испреплетува, односно продолжува и во следните фенофази. Додека во некои региони виновата лоза се наоѓа во фаза цветање и оплодување. Во услови кај нас, оваа фенофаза започнува средината на мај се до првата половина на јуни. Таа просечно трае 20 дена. Овошките исто така во овој период се во интензивен раст, се препорачува да се продолжи со нивна прихрана и третирање против болести и штетници.
Во следните денови ќе преовладува променливо облачно време со повремени локални врнежи од дожд. Во попладневните часови наместа ќе има услови за развој на нестабилна облачност со пороен дожд и грмежи. Во сабота се очекуваат поинтензивни процеси во форма на невреме со пообилен пороен дожд, грмежи и засилен ветер.
Доколку почвените услови тоа го дозволуваат земјоделците може да продолжат со изведување на работи во поле, прихрана, садење на одредени топлољубиви култури, заштита на растенијата од појава и развој на болестите и штетници, уништување на плевели, внесување на ѓубрива, како и други земјоделски активности.
Минималната температура ќе се движи во интервал од 4°C до 12°C, а максималната температура ќе се движи во интервал од 17°C до 26°C.
Извор: Агрометео
