Во изминатата седмица кон крајот на неделата на некои места имавме ниски температути кои се спуштија под нула и предизвикаа појава на мраз. Овие ниски утрински температури со појава на мраз можат да се одразат негативно на земјоделските култури а најмногу на овошните видови. Овие доцни пролетни мразеви претставуваат голема опасност за земјоделските култури, особено кај овошките и виновата лоза, и можат да предизвикаат сериозни штети во земјоделството, значително да ги намалат приносите бидејќи растенијата тогаш се во фаза на интензивен раст.
Овошките се често изложени на опасност од доцни пролетни мразeви. Мразот може да ги уништи новоформираните плодови и цветови, што директно го намалува приносот, особено кај чуствителните култури како што се праската, кајсијата и црешата. При температурa од -1°C до -2 °C страдаат зачетоците на плодовите, а при температурa од -2°C до -3°C страдаат цветовите. Младите плодови се чуствителни на -0,5°C до -2°C. Може да се јават деформации, некротични дамки, пукање. Може да дојде и до оштетување на листовите и младите ластари. Генерално, доцните мразеви доведуваат до нарушување на репродуктивната фаза, намалување на ефикасноста на оплодување, физиолошки стрес и зголемена осетливост на болести.
Ниските температури во мај се особено опасни и за лозовите насади бидејќи тогаш лозата е во фаза на интензивен раст и пораст на ластарите. Додека во зима лозата може да издржи екстремни минусни температури, во мај зелените делови се исклучително чуствителни. Главните ефекти од ниските температури во овој период се: замрзнување на зелените изданоци и лисја. Младите изданоци и лисја умираат на температура од -2,5°C. Оштетените делови брзо венеат, стануваат водени, поцрнуваат и се сушат како да се „изгорени“. Доцните мразеви во мај често ги уништуваат главните пупки на окцата, кои се најплодни и најродни, и може да се изгуби голем дел од приносот. Во таа година, доколку се оштетени лозата активира секундарни пупки, но приносот од нив е значително помал или воопшто нема. Ако се појави мраз непосредно пред цветањето, цветовите можат да се исушат и да паднат, што директно го уништува посевот за таа сезона. Дури и температурите под 10°C во мај значително го забавуваат метаболизмот и растот на растението, дури и ако нема видлив мраз.
Оптимално за раст е од (20°C до 30°C ). Штети од ниските температури може да се јават и кај поледските култури. Ниските температури го забавуваат растот и можат трајно да ги оштетат младите растенија од пченка и пченица, намалувајќи го нивниот потенцијал за принос. Температурите близу или под 0°C драстично ја забавуваат дисимилацијата и метаболичките процеси кај растенијата, што доведува до застој во развојот.
Заштитата од доцните пролетни мразеви кај земјоделските производители треба да биде клучна бидејќи тогаш вегетацијата е во полн ек, а растенијата се најчуствителни. Постојат повеќе методи и мерки за заштита, како што се превентивни и активни мерки, тука спаѓаат: задимување (димење), оросување (вештачки дожд), загревање, мешање на воздухот, избор на сорти отпорни од ниски температури, покривање со материјал, биостимулатори и „анти-фриз“ препарати, варосување на стебла и др. Изборот на најповолниот метод зависи од економските фактори.
Времето во следниот период ќе биде променливо облачно време со повремени врнежи од дожд. Наместа ќе биде нестабилно со пороен дожд и грмежи. Во петок и во сабота на повеќе места се очекуваат поинтензивни процеси со пообилен пороен дожд, грмежи и засилен ветер. Утринските температури ќе бидат во пораст, а дневните до сабота ќе се задржат пониски.
Доколку почвените услови тоа го дозволуваат земјоделците може да продолжат со изведување на работи во поле, прихрана, садење на одредени топлољубиви култури, заштита на растенијата од појава и развој на болестите и штетници, уништување на плевели, внесување на ѓубрива, како и други земјоделски активности.
Минималната температура ќе се движи во интервал од 6°C до 15°C, а максималната температура ќе се движи во интервал од 16°C до 32°C.
Извор: Агрометео
