Законот за органско земјоделско производство беше усвоен во Собрание, означувајќи важен чекор кон развојот на земјоделството и усогласувањето на државата со европските стандарди.
Кои се барањата за производство на органска преработена храна?
(1) За производство на органска преработена храна се применуваат барањата утврдени во овој член, како и барањата утврдени во членовите 11, 12 и 13 од овој закон.
(2) Прехранбените адитиви, помошните средства при преработка и другите супстанции и состојки кои се употребуваат во преработката на храна, како и сите применети практики на преработка, како што е чадењето, мора да бидат во согласност со начелата за добрата производствена пракса.
(3) Субјектите кои произведуваат преработена храна треба да воспоставуваат и да применуваат постапки кои се базираат на системско утврдување на клучните чекори во преработката со што обезбедуваат дека произведените преработени производи во секој момент се во согласност со овој закон и треба да:
а) спроведуваат мерки на претпазливост;
б) спровeдуваат соодветни мерки за чистење, да ја следат нивната ефикасност и да водат
евиденција за истите и
в) гарантираат дека на пазарот не се пласираат неоргански производи со ознака која упатува дека се органски произведени.
(4) Органските преработени производи, производите во преод и неорганските производи треба да се подготвуваат временски и просторно одвоени едни од други.
(5) Доколку во единицата за подготовка се подготвуваат или се складираат органските преработени производи, производите во преод или неорганските производи, во која било комбинација, субјектот е должен:
а) да го извести контролното тело;
б) да продолжи со непрекинато извршување на активностите до завршување на производната серија, просторно или временски одвоено од слични активности кои се извршуваат на било кој друг вид на производ (преработен органски производ, производ во преод или неоргански производи);
в) да ги складира преработените органски производи, производите во преод или неорганските производи, пред и после извршување на активностите, така што да се просторно или временски одвоени едни од други;
г) да води ажурирана евиденција за сите преземени активности, како и за количината на преработените производи, да ја чува и да ја става на располагање при вршење на контрола;
д) да преземе потребни мерки за да се обезбеди идентификација на серијата и за да се избегне мешање или меѓусебна замена на органски преработените производи, производите во преод или неорганските производи и
ѓ) да спроведува активности врз органски преработените производи, производите во преод или неорганските производи само после извршено соодветно чистење на опремата за производство.
(6) Не е дозволено да се користат производи, супстанции и техники со помош на кои повторно се воспоставуваат својства кои се изгубени во текот на преработката и складирањето на органска храна, кои ги отстрануваат последиците од небрежност во преработката на органска храна или кои на било кој друг начин може да доведат до заблуда за вистинската природа на производите наменети за пласман на пазарот како органска храна.
(7) Посебните барања за производство на органска преработена храна, како и употребата на одредени производи и супстанци при преработка на храната поблиску ги пропишува министерот.
Службен весник на РСМ бр.56/2026 од 17.03.2026 влегува во сила на 25.03.2026, ќе започне да се применува од 1 јануари 2027 година.
