Одгледувањето на цитруси понекогаш е вистински предизвик, а за да добиете први плодови треба многу напор, но и трпеливост.
Грижата за овој вид овошје понекогаш може да биде вистински предизвик, а ние ви даваме неколку совети како успешно да ги одгледувате во саксија во вашиот дом и во дворот.
Иако мандарините најчесто се поврзуваат со растенија од потоплите региони затоа што потекнуваат од Југоисточна Азија, а успешно се одгледуваат и на Медитеранот, тие припаѓаат на агрумите кои се најотпорни на ниски температури. Тие можат да преживеат и до -4 ° Целзиусови. Мандарините не сакаат премногу високи температури, па во тој случај добро е да ги ставите во сенка.
Обезбедете дренажа и доволно простор за раст на корењата
Цитрусите можат да се одгледуваат од семе или расад и при тоа треба да се има предвид дека одгледувањето од семе трае долго време и дека ќе почекате и до 7 години за првите плодови. Затоа повеќе се исплаќа да се купат садници затоа што тие побрзо ќе дадат плод.
Садот во кој е засадена мандарината треба да биде поголем од коренот за да не мора да се пресадува премногу често, а исто така треба да има околу 10 см слободен простор од коренот до дното. Треба да изберете сад што не се стеснува на врвот затоа што ќе ви биде тешко да го одржувате и да го пресадувате растението. Важно е да се стават камења на дното пред садењето поради дренажата и потоа да се стави супстрат за садење.
Кога купувате супстрат, најдобро е да изберете некој што е прилагоден за одгледување цитруси, затоа добро прочитајте ги декларациите. Откако ќе го засадите растението, ставете го на место со многу сонце, идеално би било да има околу 5 до 6 часа сончева светлина, а јужните страни се најдобри. Редовното наводнување е важно, а можете и да ја задржите влагата со помош на прекривка (малч).
Се пресадува за три до четири години, а за првите плодови потребна е трпеливост
Дрвото на мандарината е помало во споредба со другите агруми, и може да расте од 3 до 4 метри во висина, иако може и да се реже. Веднаш штом корените ќе почнат да излегуваат низ дупките на саксијата, време е да се пресади во поголема, а ова ќе треба да се прави на секои три до четири години.
Кога ја вадите мандарината на отворено после зимата, постепено прилагодете го дрвото на надворешни услови за да спречите губење на лисјата, а истото важи и при внесувањето во есен. Потрудете се да го внесете во затворена просторија пред првиот мраз.
Добро е мандарината да се прихрани еднаш месечно со течно ѓубриво кое е богато со азот и фосфор или она што е прилагодено за агруми.
Сепак за првите плодови ќе треба да бидете стрпливи и тоа околу три до четири години.
