Општина Крива Паланка и претставниците на 16 месни заедници ја информираат јавноста
дека утре, 26 февруари 2026 година, ќе се одржи мирен протест организиран од граѓани,
поради неконтролираното движење на говеда и штетите врз имот и земјоделски
површини.
Општината потсетува дека надлежните институции веќе донесоа правосилни решенија и
задолжителни мерки за регулирање на оваа состојба. Непочитувањето на овие решенија
го загрозува јавниот ред, безбедноста и имотните права на граѓаните.
Сите учесници се повикуваат на одговорно и мирно однесување, додека Општина Крива
Паланка и претставниците на 16 месни заедници активно ги следат настаните и ќе
преземат сите мерки во рамки на своите надлежности за заштита на јавниот интерес.
Од друга страна, директорот на АХВ Оливер Миланов, во денешното интервју за Прес24 вели дека тие самостојно преземаат мерки, без учество на Општината, но и без детали, затоа колку говеда, какви мерки се преземаат…
„Акциите за собирање на говедата од Крива Паланка ќе продолжат и во наредниот период. Проблемот е повеќегодишен. Во моментов сите активности се на товар на Агенцијата, финансискиот дел, човечките ресурси, опремата и техничкиот дел. Ниту Општината, ниту некоја друга институција е вклучена во процесот. Клучно е да се најде системско решение за решавање на овој голем проблем пред кој многумина во минатото само замижувале. Полека оди процесот на собирање и подигнување на говедата за кои во изминатиов период нивните сопственици неадекватно и недоволно воделе сметка. Сега, оставени сами на себе низ годините животните се и неконттролирано размножени. Како институција се обидуваме да најдеме трајно решение за нив. Во меѓувреме работиме на нивно собирање, но, постојано сме изложени на предизвици – непристапен терен и често и агресивно однесување на поранешните сопственици, за што реагира и полицијата.
Основно е наоѓање на системско решение за проблемот кое ќе значи неможност вакви случаи да ни се повторуваат и во иднина“, вели Миланов.
Се наметнува прашањето, зошто сите надлежни, сите инволвирани парцијално наводно преземаат мерки – едните протестираат, другите бркаат крави, а јавноста не знае ниту кога ќе се спасат земјоделците од штетата што ја прават слободно пуштените говеда, ниту колку се на број, ниту има ли заловени и ако има каде се сместуваат, затоа што се шпекулирта со ројка од 500-900 крави! И да се заловат сите, каква ќе биде нивната судбина и чии се или чии ќе бидат по заловувањето?
Најмалку е познато пак кога ќе се реши проблемот и кој ќе одговара за ова неконтролирано дивеење на животните. Тие не можат да бидат виновни!
