Директорот на Државниот инспекторат за земјоделство г-дин. Васе Анакиев присуствуваше на престижниот меѓународен саем “Wine Vision by Open Balkan” во Белград – настан кој прерасна во една од клучните регионални платформи за промоција на виното, храната и гастрономската култура на земјите од Западен Балкан. Овој саем годинава собра голем број учесници и посетители, а особено впечатлива беше силната македонска претставеност со повеќе од 100 домашни изложувачи – винарии, производители на храна, мали семејни бизниси и реномирани компании од агро-прехранбениот сектор.
Како дел од официјалната делегација, Директорот на Државниот инспекторат за земјоделство, заедно со Министерот за земјоделство г-дин. Цветан Трипуновски ги посетија македонските штандови, при што остварија непосредни средби со производителите, дискутираа за нивните искуства, предизвици и можности за проширување на извозот. Посетата беше силен показател за поддршката што институциите ја даваат на домашниот аграрно-прехранбен сектор, особено во делот на унапредување на квалитетот, безбедноста на храната и зголемувањето на конкурентноста на меѓународниот пазар.
На саемот, македонските излагачи повторно го потврдија високиот квалитет на нашите вина, кои се препознаени по уникатниот тероар, традицијата, автохтоните сорти како Кратошија и Станушина, како и современите производствени процеси што ги следат највисоките европски стандарди. Покрај виното, голем интерес предизвикаа и традиционалните македонски прехранбени производи, органски производи и специфични гастрономски специјалитети кои ја претставија богатата македонска кујна.
Саемот претставуваше можност за интензивирање на регионалната економска соработка преку иницијативата Open Balkan, важна платформа која овозможува полесен проток на стоки, услуги и идеи меѓу земјите од регионот. Во тој контекст, присуството на Директорот на Државниот инспекторат за земјоделство беше особено значајно, бидејќи инспекторатот игра клучна улога во осигурувањето на квалитетот и безбедноста на сите земјоделски и прехранбени производи кои се пласираат на домашниот и меѓународниот пазар.
