Милена Ангелова е преработувач на храна од неживотинско потекло од мал обем која има искуство со регистрација за продажба од куќен праг. Според неа, регистрацијата за продажба од куќен праг значително го поедноставува процесот за малите производители кои сакаат легално да го пласираат својот традиционален производ.
„Процесот за да се регистрираш за продажба од куќен праг е брз и многу поедноставен. Потребно е да се има простор каде што се работи ајварот – просторот да биде со плочки, да има довод и одвод на вода и основни услови за работа. Не се бара ХАСАП систем затоа што станува збор за традиционално производство“, објаснува производителката.
Покрај ова, потребно е и земјиште каде што се одгледуваат суровините – пиперка, домати, слива, кајсија или друго овошје и зеленчук.
„Кај мене просторот беше на сопругот, како и земјиштето каде што го одгледуваме доматот и пиперката. Ни требаше само еден ден да направиме договор за користење на просторот и земјиштето, фотокопија од лична карта, а потоа инспекторите дојдоа да извршат увид. За ден-два ги доставивме документите, а за една недела максимум добивме решение од АХВ, бидејќи сè беше во ред.“ Ние работиме со преработка и производство на овошје и зеленчук. Сакаме да го задржиме традиционалното производство – пиперот печен на дрва, рачно лупен – а машините да ни бидат помош само во делот на пастеризацијата.“ – вели Милена.
Со поддршка од Increasing Market Employability – IME – Програмата за зголемување на пазарната вработливост.
