Нискобуџетната унгарска авиокомпанија „Визер“ ја укинува авиолинијата од Скопје до Будимпешта и од 9 март годинава повеќе нема да лета на оваа дестинација, а од неодамна не продава и билети за оваа рута.
Од „Визер“ за МИА ја потврдија информацијата и изјавија дека континуирано ги следат перформансите на своите рути за да овозможат најпопуларните дестинации да имаат најниски можни цени.
– Како што е вообичаена практика, „Визер“ ја оптимизира својата мрежа врз основа на резултатите од овие прегледи. Со силна посветеност за одржување на капацитетот во Северна Македонија и Централноисточна Европа, „Визер“ продолжува да ги подобрува своите услуги и да истражува нови можности за раст во регионот. Сите погодени патници се информирани за промените и им се понудени алтернативни опции за патување, како и опции за целосно враќање на средствата во форма на оригинално плаќање или „Виз кредит“, истакнаа од компанијата за МИА.
Од Министерството за транспорт и врска, пак, за МИА посочија дека линијата Скопје- Будимпешта никогаш не била предмет на финансиска поддршка, односно за таа линија Министерството не исплаќало средства.
– Политиката на Министерството за транспорт е развој на авиосообраќајот и во таа насока со новиот концепт што го промовираме за само шест месеци успеавме да обезбедиме десет нови линии. Очекуваме преку овие политики дополнително да го развиваме авиосообраќајот, да обезбедиме квалитетни услуги и да ја промовираме Македонија како атрактивна дестинација за туристите, нагласија од Министерството за МИА.
По воведувањето на новиот начин за субвенционирање на авиолинии од страна на Владата, „Визер“ доби субвенции за летови од Скопје кон Лион, Барселона и Штутгарт. За овие дестинации летовите почнуваат од 30 јуни, а „Визер“ веќе продава билети.
МИА
