Од денешниот протест пред Државниот завод за статистика претседателот Трпе Деаноски рече дека доколку од Владата навистина сакале дијалог тие во моментов не би биле на улица.
-Владата наместо да пишува соопштенија и да негира се што ќе кажеме ние, а не е воопшто во право треба да си посвети енегрија и да најде начин како да го реши овој проблем, ако Владата сакаше дијалог до сега ќе бевме седнати на маса а не на улица. Ние од наша страна направивме се, сите средби ги завршивме со ресорните министри, подршка од нив добивме, се направија колективни договори како што треба, но за жал тие не беа потпишани, што значи дека ресорните министри немаат сила да потпишат колективен договор иако нема никаква законска пречка за тоа – Трпе Деаноски – претседател на УПОЗ.
Денешниот беше трет протест по ред, а кулминацијата ќе биде утре кога вработените во 6 министерства и 2 државни инситуции ќе излезат на заеднички протест пред Министерството за финансии.
Деаноски алармираше и дека речиси 1000 вработени во сите инспекторати низ државата немаат земено плата за месец декември.. Потпретседателот на независниот синдикат на Државниот инспекторат за труд Љуљзим Фаризи објаснува дека платите доцнат поради нетрансформирање на нивните договори откако бил укинат инспекцискиот совет, а инспекторатите се префриле во состав на министерствата, за што од Владата добиле уверување дека до утре ќе има соодветно решение.
-Од советникот на премиерот имаме гаранции дека денеска до утре ќе имаме одговор на тоа како побрзо да се реши статусот на вработените во инспекциските служби се со цел да добиеме побрзо плата и да се трансформира работниот однос- Љуљзим Фаризи – независен синдикат на Државен инспекторат за труд.
Фаризи ова го изјави по средба на Независниот синдикат на државната администрација со претставник од Владата на која тие ги претставиле своите забелешки околу новиот Законот за државни службеници. На средбата меѓудругото се разговарало и за додатоците на плата, решавање на статусот на вработените во инспекциските служби и менување на правилникот за дежурства во судската служба. Претставниците од синдикатот изјавија дека се задоволни од средбата, по која било договорено да имаат вакви состаноци на месечно ниво.
Извор – Канал5
