Почитувани земјоделци, агробизнисмени, земјоделски здруженија, задруги, синдикати, асоцијации, агрокомори…во овие вонредни услови за работа во нашата држава, време е да се екипираме и заеднички делуваме во интерес на земјоделското производство и вкупниот агрокоплекс.
Домашното производство на храна и на земјоделски производи како никогаш до сега го покажува своето значење за сите граѓани, стожер на стопанството и силата на една држава. Без домашни земјоделски производи државата е ранлива и несигурна.
Токму затоа, сега е потребна максимална концентрација на вашето познавање на работата, контактите со другите колеги земјоделци и агробизнисмени и релацијата со Владата односно Министерството за земјоделство заедно со сите институции од областа на агросекторот и граѓаните.
Навремените и точни информации исклучиво треба да ги добивате од институциите и да ги следите нивните препораки.
Министерство за земјоделство, шумарство и водостопанство, Агенција за храна и ветеринарство,Платежна Агенција, Државен земјоделски инспекторат, Агенција за поттикнување на земјоделството и руралниот развој
Точни и навремени информации ќе имате и овде на Агротим.мк како и стручни совети, препораки, информации за исплата на субвенции, јавни повици за ИПАРД и други соопштенија од институциите.
Нашата зедничка доверба која ја градевме со години, сега треба да ја ставиме во функција на поддршка на вкупниот аграр за да поминете со најмала штета, а да и помогнеме на државата и стопанството.
Предлагајте, сугерирајте, жалете се, барајте решенија, кажувајте каде може да се набават вашите производи, давајте идеи како да се надмине овој тежок период.
Преку Агротим.мк целата наша комуникација ќе биде пренесена до институциите кои во овој момент се на висина на задачата и ќе се обидат да одговорат на сите ваши барања.
Ви стоиме на располагање на сите на следните телефони 071 225 345 или на [email protected]
Со оглед дека сме на почеток на новата земјоделска 2020, време на пролетна сеидба, на кроење, врзување во овошните и лозовите насади, подготовка на расади, а во фармите константно иста работа и исти проблеми…кажете што е она што ви е неопходно за овој период и тоа што очекувате за извршување на другите агротехнички мерки.
Одете на сигурно производство, за кое знаете дека ќе има пласман. Доколку имате поголеми површини, насејте ги со сончоглед преку договорно производство со што ќе имате и гарантирана цена. Контактирајте со трговците и откупувачите за да имате предвид што и како да произведувате.
Следете ги понудите на соработниците на Агротим, ние соработуваме само со сериозни компании и фирми.
Почитувани претседатели на земјоделски здруженија, задруги, асоцијации, комори, синдикати…ова е и ваше време, да покажете и да го оправдата постоењето на здружената форма како најдобро решение за земјоделците. Борете се за нив, давајте предлози во името на вашите членови, доставувајте барања и барајте поддршка од институциите. Тука сме да помогнеме вашите заложби да добијат гласност и реализација.
Заедно можеме многу да направиме.
Ленче Николовска
