Сите производствени капацитети од прехранбената индустрија во земјава се подготвени за наредните неколку месеци и имаат соодветни резерви, но бараат државата да им излезе во пресрет и да овозможи ослободување од даноци за репроматеријалите што не се произведуваат во нашата држава.
Ова, како што истакна министерот за економија Крешник Бектеши, се главните заклучоци од денешната средба во Министерството за економија на која присуствуваа и министерката за финансии Нина Ангеловска, директорот на Царинската управа Ѓоко Танасоски, директорот на Државниот пазарен инспекторат Стојко Пауновски и многу стопанственици, особено од прехранбената индустрија.
„Во текот на денот, а најдоцна утре ќе донесеме соодветни одлуки за намалување на давачките за неколку репроматеријали. Тоа ќе го предложиме на влада заедно со министерката Ангеловска, со цел да имаме непречено производство на храна, но и на индиректен начин да ги намалиме цените или да не дозволиме да се зголемат цените на производите, посебно на основните прехранбени продукти“,рече Бектеши.
Тој им порача на граѓаните дека нема простор за паника бидејќи има доволно храна и резерви.
