Евроамбасадорот Дејвид Гир во интервју за Радио Слободна Европа го поздрави „напредокот на македонската влада“ на патот кон Европската Унија. Според него, значителен напредок е постигнат не само во дискусиите за реформската агенда, туку и во самиот реформски процес, кој позитивно се развива дури и во краткиот период откако е формирана владата. Во однос на уставните амандмани, Гир истакна дека веќе има решение на маса. Тој потсети на интензивните преговори кои се водеа од есента 2020 година и кулминираа со договорот постигнат на 22 јули 2022 година. Гир ги призна компромисите направени од двете страни за да се дојде до овој договор и го оцени како најдобриот можен во даденото време.
„Дали оваа влада би можела да постигне подобар договор? Јас лично многу се сомневам во тоа. Се разбира, тоа е прашање меѓу двете влади, но многу се сомневам дека тоа може да се постигне. И не гледам интерес во Брисел за повторно разгледување на преговарачката рамка, која е основа на преговорите. Како што велам, има решение на маса. Би било добро сега да напредуваме кон тоа решение.“, рече Гир.
Гир зборуваше за заемот од половина милијарда евра од Унгарија, прашање кое предизвикува многу дискусии во јавноста. Иако не може да коментира конкретни детали на заемот, Гир потврди дека ваквите заеми се вообичаена практика во рамките на Европската Унија. За 700 милиони евра од ЕУ за раст на Западен Балкан додаде новата Влада одлично ја исполнила задачата.
„Целосно се ангажираа. Во Брисел ќе има дополнителни разговори со земјите членки на ЕУ. Но, јас сум голем оптимист дека во текот на почетокот на есента, сето ова ќе биде завршено и ќе може да почне да ја поддржува Северна Македонија преку западните фондови.“, рече Гир.
