Колку семејства, толку рецепти за ајвар, кој се смета за врвна зимница. Списокот на состојки кои влегуваат во составот е различен и зависи од вкусот. Класичниот рецепт од зеленчук задолжително мора да содржи црвени, меснати пиперки, а може да се додаде и лук, модар патлиџан или морков. Ако ви се допаѓа лутата верзија, додадете лути пиперки. Може да се користи како салата, намаз, сос, додаток на главните јадења. А неговата густина варира според рецептите, па може да биде погуст или потечен.
Печена или варена пиперка?
Кога станува збор за зимница, подготовка е најтешка и често трае неколку дена.
Плодовите зеленчук кои се користат треба да се свежи, цврсти, здрави, бидејќи само таквите ќе дадат квалитетен краен производ.
Основата на традиционалните рецепти е да се пече пиперката додека лушпата не поцрни, а потоа да се излупи откако ќе се излади.
Се оставаат преку ноќ да се исцедат за да имаат што помалку вода, а потоа се мелат во машина за мелење месо.
Посебно внимание треба да се посвети на растителното масло што го користиме. Тоа е обично сончогледово или пченкарно масло, а поновите рецепти вклучуваат сусамово, ореово или маслиново масло. Во зависност од тоа, ајварот може да има различни вкусови.
Втората група рецепти за основа има варена пиперка. Свежите пиперки се маринираат во саламура со вода, оцет, масло, шеќер и сол за полесно да се сомелат. Во овој случај, периодот на подготовка е пократок. Многумина тврдат дека нема разлика помеѓу вака подготвената пиперка и печената.
И патлиџанот исто така се обарува за да се отстрани горчината.
Важно е пржењето
Вториот дел од подготовката се однесува на пржењето на веќе измелената пиперка и другите состојки во масло. Затоа е важно самата пиперка да содржи што помалку вода и да ја оставиме добро да се исцеди по печењето или маринирањето.
Во маслото се додаваат мелените состојки и зачините (лук, сол, шеќер, оцет). Клучно е се добро да се испржи, бидејќи од тоа многу зависи можноста за чување, густината, структурата и вкусот. Се користат тави со најшироко можно дно за да имаат што поголема површина што се загрева. Масата постојано се меша.
Теглите за пакување е потребно да се измијат и стерилизираат. Топлиот, испржен ајвар се полни во врели тегли кои ги затвораме и ги превртуваме наопаку. Покријте ги со ќебе или крпа и оставете ги да се изладат преку ноќ. Се чува на ладно место неколку месеци.
Извор: agroklub.rs
