Европската агенција за безбедност на храната (EFSA) во својата стручна ревизија за проценката на ризикот на активната супстанција глифосат не идентификувала критични области и објави дека нема причина за загриженост за ризикот за луѓето, животните и животната средина.
Одобрувањето на Европската Унија за глифосат, кој со децении нашироко го користат земјоделците, истекува на крајот на годината, а заклучокот на EFSA е клучен дел од процесот на одлучување дали ќе се обнови.
Оваа активна супстанца е во средиштето на контроверзиите откако Меѓународната агенција за истражување на ракот (IARC) на Светската здравствена организација во 2015 година заклучи дека најверојатно е канцерогена за луѓето. Тогаш хемискиот гигант Bayer објави дека десетици студии покажале дека глифосатот е безбеден за употреба.
Европската комисија ќе одлучи дали ќе предложи обновување на одобрението за глифосат врз основа на заклучокот на EFSA и извештајот на групата од четири земји на ЕУ. Останатите членови подоцна ќе гласаат за предлогот на Комисијата.
Bayer го поздравува заклучокот на оваа Агенција, нарекувајќи го основа за успешно повторно одобрување на глифосат во ЕУ, пишува Euronews. Германската групација го купи Roundup како дел од купувањето на американската агрохемиска компанија Монсанто од 63 милијарди долари во 2018 година и оттогаш потроши милијарди долари на серија тужби во САД во кои се тврди дека хемикалијата предизвикала рак.
Во соопштението на EFSA се наведува дека тие идентификувале недостатоци во податоците, односно дека не може целосно да се процени прехранбениот ризик за потрошувачите и ризиците за водните растенија, но дека потрошувачите не треба да бидат загрижени. Но, наведоа дека 12 од 23 предложени употреби на глифосат претставуваат висок долгорочен ризик за цицачите.
Последен пат кога предмет на расправа било обновувањето на лиценцата за употреба на глифосат, Европа потроши две години одлучувајќи за одобрението. Групацијата за обновување на Глифосат, група на компании што ја вклучува и Bayer Agriculture, поднела барање за обновување во ЕУ во 2019 година.
Процесот требаше да биде завршен минатата година, но обемот на информации и јавниот придонес го одложија.
