Националната федерација на фармери денеска одржа редовна седница на Годишното собрание на НФФ, на која се разгледаа активностите кои следуваат за тековната година и извештаите од претходната година.
На свечениот дел, се обратија претставници од Федерацијата и претставници од инститиции кои во текот на изминатиот период соработувале со организацијата, вклучувајќи ја и претседателката на НФФ Васка Мојсовска, министерот за земјоделство, шумарство и водостопанство Љупчо Николовски, министерката за труд и социјална политика, Јована Тренчевска и регионалната директорка на We Effect Europe, Анели Леина.
На седницата беа доделени благодарници за соработка со Националната федерација на фармери, а добитник на благодарница беше и министерот Љупчо Николовски.
„Посебно ми значи денешната благодарница од Национална федерација на фармери. Таа е доказ за нашата успешна досегашна соработка, но за мене и обврска истата уште повеќе да ја развиваме во нови проекти и успеси во корист на земјоделците“, рече Николовски.
Николовски нагласи дека соработката со Националната федерација на фармери е од исклучително значење.
„Ние сме партнери во вистинска смисла на зборот. Заедничките успеси се многубројни, со јасна визија и цел:
-Жените земјоделки за прв пат во историјата после 30 години добија право на платено мајчинство.
-Заради успешноста на мерката Рурална жена двојно ја зголемивме поддршката од 3.000 на 6.000 евра и постигнавме рекордни резултати.
-Заедно ја креиравме најголемата земјоделска реформа и новиот модел за субвенционирање.
-Новата програма за мали производители и мали семејни винарии.
-Креиравме правилници за продажба од праг и фарма.
-Ја спроведовме програмата за откуп и дистрибуција на македонското јаболко до 186.000 ученици.
Заедно не чекаат уште многу нови предизвици за нови успеси!“. рече Николовски.
