Сигурно веќе многупати сте слушнале дека овошките е најдобро да ги садите во есен.
Но, ако не сте стигнале да го направите тоа, а сакате својата градина да ја збогатите со плодоносно стебло, не е доцна ни сега. Па ни во април или во мај.
Без оглед кога го садите, ако сакате дрвцето добро да се зафати и здраво да расте, потребно е да му обезбедите дополнителни услови.
Прво и најважно е садниците што сте ги купиле да се во мирување, а тоа значи да немаат пупки, ливчиња или цветови.
„Садниците треба да се чуваат во ладилник каде што се одржува мирувањето. Расадничарите ги вадат од земјата и ги ставаат во браздите. Таквото младо стебло можете да го посадите кога сакате“, советува дипл. инж. Томислав Солдо.
Што ако садницата разлистала?
Но што е со садниците кои многу луѓе ги купуваат во трговските центри, кои веќе разлистале или дури и процветале, а истовремено се жедни за вода и ѓубриво?
„На таквата садница треба да и се помогне со смеса од вода, земја и по можност ѓубриво“, советува Солдо како да се оживее младото растение. Вели, ако немате ѓубриво, доволно ќе биде и земја и вода бидејќи овошката дехидрирала. Така се чува 48 часа, по што се поткаструваат подебелите корени, а се остава оној повлакнестиот, тенкиот, кој ја впива водата и растворените минерални состојки од почвата. „Ако го исечете подебелиот дел од коренот, нема да биде потребно да се прави ни голема дупка за садење“, коментира Солдо.
Не садете предлабоко
Кога станува збор за садењето, советува да не садите подлабоко од колку што било засадено во расадникот. Затоа обрнете внимание на кореновиот врат – делот од растението веднаш над коренот. Значи, садницата во земјата треба да биде до тој посветол дел од тенкото стебло.
Би било идеално во дупката да ставите и ѓубре, но никако директно на коренот. Тој прво се посипува со одредена количина земја, на што се расфрла ѓубривото, а после тоа се затрупува со остатокот од земјата и се нагазува.
Ако немате систем за наводнување „капка по капка“, овошката во случај на недостиг на дожд, доволно е обилно да се залее еднаш неделно.
Извор: agroklub.com
