Европската комисија предложи повлекување на 56 милиони евра од буџетот на ЕУ за да им помогне на Полска, Бугарија и Романија да се справат со зголемениот увоз на житарки и маслодајни семиња од соседна Украина, објави Euractiv.
Ова прашање го покренаа Полска, Романија, Унгарија, Словачка и Бугарија, жалејќи се на „патиштата на солидарноста“ што се користат за транспорт на украинското жито. Наместо овие земји да станат само транзитна област, на нивниот пазар завршуваа големи количини. Ова ги стави нивните земјоделци во неповолна положба, кои не можеа да ги продаваат своите производи или добија многу ниски цени за нивните посеви.
„Ова е поддршка за земјоделците погодени од зголемувањето на увозот од Украина, а не последиците од војната“, коментирал комесарот за земјоделство Јануш Војчичовски.
Барањата за поддршка што дошле од Словачка и Унгарија биле одбиени по анализата на Комисијата, која ги зела предвид промените во понудата на различни пазари за житарки и маслодајни семиња.
Здружението на земјоделци на ЕУ Copa-Cogeca објави дека мерките за поддршка пристигнале предоцна, не се доволни и не се кохерентни. Тие ја повикаа Комисијата да ги поддржи украинските земјоделци, но да не ги заборави своите.
Најголем дел од помошта, околу 30 милиони евра е наменета за Полска, Бугарија ќе добие 17, а Романија 10 милиони. Вкупниот износ на помошта би можел дури и да се удвои на 112 милиони евра бидејќи Комисијата им дозволува на трите земји членки да кофинансираат мерки за поддршка користејќи средства од нивните национални буџети.
Ова е вторпат Комисијата да ја користи земјоделската резерва, вклучена во шемата на Заедничката земјоделска политика за тековниот програмски период. Со финансиска рамка од 450 милиони евра годишно, фондот може да се користи за финансирање исклучителни мерки за борба против пазарните нарушувања кои влијаат на производството или дистрибуцијата.
„Имаме резерва за кризни ситуации и искористивме само 56 милиони евра“, рече комесарот Војчечовски.
