Главното место за средба на иноваторите и големите компании на пазарот за земјоделски машини и растително производство ќе се одржи во Хановер, Германија од 12 до 18 ноември.
Агритехника 2023 ќе собере бројни производители и дистрибутери на земјоделски машини, инженери, програмери, истражувачи, земјоделци и други заинтересирани.
Организаторот, Германското земјоделско друштво DLG, посочува дека веќе се пријавени 2.000 излагачи од 49 земји. Сите водечки компании за земјоделска механизација се застапени и ќе презентираат производи кои ќе ја дефинираат иднината на растителното производство.
Се очекуваат повеќе од 400.000 посетители. Ќе им биде достапен преглед на земјоделски технологии, шумски решенија, апликации за уредување на околината, биогорива и многу повеќе.
Важен сектор на седумдневната изложба е Systems & Components, B2B пазар на кој инженерите, истражувачите, менаџерите за набавки и здруженијата се поврзуваат и споделуваат знаење за најновите случувања во земјоделството. Исто така, постои нова платформа DLG за земјоделските и прехранбените системи на иднината, со силни врски со земјоделците „Inhouse Farming – Feed & Food Show“.
„Како најголем светски саем во индустријата, Агритехника не е само водечка меѓународна деловна платформа, туку и форум за светска професионална размена на растително производство ориентирано кон иднината“, рече Тимо Зипф, проект менаџер.
Водечката тема е „Зелена продуктивност“, која се фокусира на предизвиците на модерното земјоделство: како може земјоделството да ја зголеми продуктивноста при заштита на почвата, климата и животната средина?
Покрај изложбениот, има и програма каде што ќе се одржуваат настани во живо, па ќе бидат доделени златни и сребрени награди за иновации.
Фотографии од последната Агритехника погледнете во галеријата под текстот.
