Цените на свинското месо во Германија достигнаа рекордни износи, пишува Agrarheute. Причината за тоа е слабата понуда која не може да ја задоволи побарувачката, што во наредниот период ќе ја диктира состојбата на пазарот. Опсегот на цени на берзата на групата од интерес на одгледувачи на свињи ISN се движела од 2,28 до 2,35 евра за килограм, а се претпоставува дека ќе расте уште повеќе.
Најновите податоци на Сојузниот завод за статистика Destatis покажуваат дека само 47,1 милиони свињи биле заклани во кланици во Германија во 2022 година. Тоа е за 9,2 отсто или 4,77 милиони помалку заклани свињи.
Просечната тежина на товениците е 96,6 килограми, што претставува намалување за 0,2 килограми во однос на претходната недела.
Зголемена е и цената на прасињата од 25 килограми и изнесува 71 евро.
Производството во Европската Унија се очекува да продолжи да опаѓа во 2023 година. Според сегашната проценка, за четири отсто.
Европската комисија предвидува пад на производството на свињи од јануари до март 2023 година од 5,1 отсто во споредба со првиот квартал од претходната година. Во вториот квартал може да биде 4,5 отсто. Во втората половина од годината се очекува таа стапка да биде пониска.
Овој сектор ќе доживее големи загуби во Германија и Данска, каде што трендот на намалување ќе биде шест проценти, а потоа следи Шпанија со околу четири проценти.
Најголемо влијание имала цената на добиточната храна која го диктира темпото на ова производство. Според холандската Рабобанк, пченката се продавала по цена за 14 отсто пониска во првата недела од јануари во однос на крајот на октомври 2022 година. Цената на добиточната пченица паднала за 11 отсто. Во наредниот период се очекува понатамошен пад на цените и намалување на трошоците за производителите.
