Сместена во падините на планината Баба, во село Арвати, винаријата „Алесто“ е првата регистрирана винарија во Преспанскиот регион. Идејата да се основа семејна винарија дошла од големата љубов кон виното на Александар Димовски, кој заедно со неговиот брат Стојанче, одлучиле да направат еден спој на заборавената традицијата во тој регион и модерниот свет и на тој начин да го промовираат Преспанскиот регион, правејќи еден спој меѓу винарството и туризмот. Името на винаријата е „Алесто“ е спој од првите букви од имињата на двајцата браќа.
„Ние сме млади ентузијасти во светот на виното, со елан за напредок и промоција на Преспанскиот вински регион. Грозјето зрее со помош на рефлексија на сончевите зраци од Преспанското Езеро, всадено во дланките на двата национални паркови Пелистер и Галичица, а нашите лозови насади се наоѓаат на надморска висина од 860 до 950 метри. Винаријата ја регистриравме во март 2022 година, а воедно аплициравме за неповратен гранд каде што ги исполнивме условите и добивме модерна опрема за современо производство на вино.“, ни открива Александар.
Капацитетот на винаријата е 5000 литри на годишно ниво, а оваа година успеале да произведат само 15% од вкупниот капацитет.
„Грозјето е од нашите лозови насади и мал дел набавивме од наши пријатели од Тиквешкиот регион, пред се за да го согледаме потенцијалот на спарување на виното од Преспанскиот и Тиквешкиоит регион. Во производството се ангажирани членовите од фамилијата, каде што имаме ангажирано стручно лице енолог за да произведиме високо квалитетно вино.“
Вината ги произведуваат само со помош на основните енолошки средства – квасец, ензим, винобран, бентонит, бидејќи сакаат да ја задржат и истакнат автентичноста на самото грозје.
„Тајната на нашите вина се крие во единственоста на Преспанскиот регион, каде што доминираат киселините и вкусот на виното поради самата надморска висина. Вината ги произведуваме само со помош на основните енолошки средства квасец, ензим, винобран, бентонит, бидејќи сакаме да ја задржиме и истакнеме автентичноста на самото грозје. Произведуваме од црвените вина Прокупец и Вранец, додека пак од бели Темјаника, а нашето розе го правиме од станушина, нашата автохтона сорта. За домашни потреби произведуваме ракија од грозје, слива, дуња. А оваа година имаме во план да направиме и ракија од јаболка.“
Александар и Стојанче се задоволни од пласманот и сакаат нивниот бренд да стане препознатлив низ цела Македонија.
„Кога станува збор за пласманот сме на самиот старт и сме задоволни од луѓето кои се интересираат да не запознаат и да купат вино од нас. Пред се сме фокусирани да изградиме бренд на локален план, каде што преку посета на самата винарија и луѓето би купувале вино. Потоа би се прошириле во локалните ресторани и за неколку години би се прошириле и низ Македонија.“, вели Александар.
„Пред се сум благодарен за финансирањето на семејните винарии преку проектот кој го добивме. Се надевам дека ќе продолжи државата и Македонските институции преку грандови да ни помага во делот со опрема и едукација. Имаме прекрасно поднебје за производство на врвни вина, тука би можела државата да ни помогне со извоз на вината и да ја постави Македонија на винската светска карта. Според мене клучно за развој на нашата винска сцена е едукацијата на луѓето преку вински салони, вински дегустации, поддршка на земјоделските стопанства, за да можат да го препознаат квалитетот на вредните мали раце на производителите. И за крај да се зацврсти целата економија за луѓето, да имаме поголема куповна моќ, за непречено да уживаме во благодетите на оваа прекрасна земја.“, заклучува Александар.
