Триесет и двајца средношколци доставија мостри на натпревар за младо вино, што го организира Земјоделското училиште во Кавадарци. Од воспитно образовната институција што постои 66 години, денеска информираа за МИА дека во конкуренција беа 21 натпреварувач со 32 примерока на младо вино, од кои 14 бели и 18 црвени вина.
– Елена Богева како претседател на комисијата и Кристина Анѓелкова, Игно Тасев, Зоранчо Николов и Деан Ѓорѓиовски, сите членови на здружението Винари од Македонија, во просториите на училиштето извршија сензорна дегустација на млади вина и ги одбра најдобрите примероци од вино, произведени од наши ученици во домашни услови. Во состав на комисијата беше вклучен и Славчо Цветков, ученик од трета година, во својство на практикант, со наставни цели, соопштија од училиштето „Ѓорче Петров”.
Дипломите и наградите за најуспешните примероци од вино, ќе се доделат утре, на свеченоста организирана по овој повод, а во рамките на одбележувањето на месецот на младото вино.
