Управниот одбор на КЈП „Водовод“ по трет пат бара согласност од Советот на Општина Кочани за покачување на цената на геотермалната вода. Новиот предлог е поскапувањето да биде за 28,08 денари за кубен метар, односно за нешто повеќе од 83 отсто. Со тоа, наместо по сегашната цена од 33,82, корисниците би ја плаќале геотермалната вода по 61,9 денари за кубен метар.
Со новото барање драстично е променета првичната калкулација за поскапување од 123,5 отсто, што потоа беше корегирана на близу 98 отсто. И двете претходни барања не добија согласност од Советот, односно на седницата во септември предлогот беше повлечен од страна на неговиот претседател, а на последната седница што се одржа пред десетина дена, корегираното поскапување не доби мнозински број гласови.
-При новата корекција е земена предвид најавената регулирана цена за електрична енергија за комуналните претпријатија од страна на Регулаторна комисија за енергетика, а што е еден од клучните елементи при утврдување на цената на геотермалната вода. Дополнително, поскапувањето е поради инвестиции за репарација на постојна и за набавка на нова потопна пумпа, потоа зголемените трошоци за плати на вработените врз основа на законска регулатива за минимална плата, како и за обновување на изолацијата на цевководот за дистрибуција на геотермалната вода, истакнуваат од Управниот одбор на комуналното претпријатие „Водовод“.
Минатата година биле испорачани близу 467 илјади кубни метри геотермална вода од што е остварен приход од 15,8 милиони денари, со кои според сегашната единечна цена не можат да се покријат трошоците за црпење и дистрибуција на водата.
При претходните две барања за покачување на цената, три оранжериски комплекси од Кочани, кои геотермалната вода ја користат како топлинска енергија, најавија откажување од услугите на работната единица „Геотерма“ на „Водовод“. Новото барање за согласност е доставено до Советот на Општина Кочани, кој треба да го разгледува на седница што е закажана за в понеделник.
