По петти пат во Куманово ќе се одржи меѓународниот саем на органски традиционални производи „Органска трпеза“ и првиот меѓународен саем за земјоделство, технологии, храна и преработки „Агро Мак 2022“, соопштија денеска организаторите.
Саемот го организираат Здружението за развој на земјоделство и заштита на животна средина преку истражување, едукација и одржување на биодиверзитет „Живот“ и Комората на органски производители – КОП од Куманово со поддршка на општината. И годинава, предвидено е двете манифестации да се одржат кај Спортско рекреативниот комплекс во Куманово од 30 септември до 2 октомври. Како што најавија организаторите, предвидено е да учествуваат околу 3.000 луѓе од кои 200 до 250 излагачи од државата, Србија, Бугарија, Хрватска, Словенија, Босна и Херцеговина, Словачка, Унгарија, Црна Гора, Косово, Турција и други.
– Во согласност со идеологијата за здрав органски начин на живеење и делување, во единство со природата и идејата за Отворен Балкан и оваа година саемите ќе се одржат на отворено, имаат уникатна програма која вклучува повеќе содржински компоненти, изложбен дел на кој преку свои штандови ќе учествуваат производители, откупувачи и преработувачи на храна, пијалоци и земјоделски производи, производители и трговци со амбалажа, алати, опрема, машини и механизација, на семе и саден материјал, хортикултура, изјави претседателот на комората, Драган Цветковиќ.
Втората компонента има промотивен дел на кој ќе се презентираат општини, агенции, асоцијации, федерации, задруги, кластери, здруженија, владини и невладини организации, стопански комори и заедници.
– Како дел од содржинските активности, ќе бидат поставени традиционални трпези на заедниците од овие простори на кои ќе бидат презентирани традиционалната храна, фолклор и култура претставени од здруженија на заедниците на националностите во државата и здруженија и организации кои ги негуваат традицијата, занаетите и фолклорот, вели Цветковиќ.
На саемот учесниците ќе имаат можност за размена на научни, стручни и апликативни мислења и практики од областа на земјоделството, добрата земјоделска пракса и производството на безбедна храна, како и потребата за овозможување на научна и стручна соработка. Во рамки на саемот ќе бидат организирани работилници, панел дискусии, тематски мини-форуми и предавања на коишто ќе учествуваат, образовни и научни институции, претставници и експерти од секторот за рурален и земјоделски развој и секторот за развој на руралниот туризам, нутриционисти, сертификатори и консултанти, претставници на државни и локални институции, дипломатски претставништва, мисии и амбасади, странски и регионални саеми и финансиски институции.
На саемот ќе има и програма за најмладите, натпревари, кулинарски настани.
