Бербата на грозјето во некои делови на Шпанија веќе започна, три недели порано од вообичаеното. Грозјето е зрело, нема што да се чека, а дневните температури се уште високи, неподносливи до тој степен што лозарите решиле преку ноќ да си ја вршат работата.
Во лозјата на винаријата „Андрес Мората“, која се наоѓа во близина на Мадрид, во срцето на Шпанија, работниците го берат грозјето со ламби на челото, како рударите.
Винарите биле принудени на оваа одлука поради претерано високите летни температури и сушата, пишува Ројтерс.
Инаку, со оваа работа таму започнуваат кон средината на септември, но годинава ја почнаа веќе на 24 август. Сопственикот вели дека роковите се поместуваат со години.
Топлото и суво лето ги принуди и француските лозари да берат порано. Бербата започна порано овој месец наместо во септември, особено сортите од кои се произведува шампањско.
Важно е да се собере грозјето пред да презрее и да има премногу шеќер.
„Мислам дека сме на пресвртница“, изјави за rte.ie Чарлс Филипонт, менаџер на семејната винарија, која произведува неколку стотици илјади шишиња вино годишно.
„Досега помагаше глобалното затоплување бидејќи можевме да береме во добри временски услови без дожд или студ, со добра зрелост и мало гниење“, коментира тој, потсетувајќи се на минатата година кога прво мразот, а потоа мувлата ги опустошиле лозјата.
Меѓутоа, при вакви временски услови, се јавува прекумерно зреење. Тоа ќе ги принуди лозарите и винарите да заземат поинакви пристапи, од порана берба, преку начинот на производство на вино или одгледување на нови сорти.
Во Италија немаат толку добри прогнози. WineNews пишува дека во провинцијата Бреша, на север на земјата, може да има пад на приносот меѓу 10 и 20 отсто поради сушата. Годинешната реколта веќе ја нарекуваат единствена поради досега невидените дневни и ноќни температури, како и екстремната суша што таму трае од февруари.
Во другите делови од земјата не е толку драматично, но во многу насади бербата на грозје веќе започна.
