Ученици и наставници од земјоделско- шумарското училиште во Кавадарци жнееја лаванда.
-Активностите беа плод на соработка помеѓу Здружението на производители на органска храна „Биовита“ и СОЗШУ „„Ѓорче Петров“ – Кавадарци, каде беше спроведена жетва на поле посеано со лаванда, на висорамнината Витачево. Учениците и наставниците работно учествуваа на овој несекојдневен чин, соопштија од училиштето.
Лавандата е уникатно растение со прекрасна и интензивна виолетова боја, има интензивен мирис, одлични вкусови и лековити дејства. Се користи во фармацијата и козметиката.
-Тиквешијата е плодна почва и за ова ретко растение – лаванда. Во наредниот период во фармацевтската лабораторија во училиштето, од лавандата ќе бидат произведени масло и сапун. Ова е уште еден предизвик за нашите вредни „фармацевти“. Производите кои излегуваат од фармацевтската лабораторија, станаа секојдневие и веќе традиција. Популарноста на профилот „фармацевтски техничар“ расте. Иако за упис во прва година беа потребни најмногу поени од сите други профили во државата, местата беа пополнети уште во првиот уписен рок. Тоа доволно зборува, се вели во соопштението од училиштето.
Ментори на учениците се професорите Блаже Ѓорчев, Влатко Тасев и Александра Петрова.
