Со едриличарска прошетка по езерото денеска во Охрид беше одбележан 21 јуни – Денот на Охридското Езеро. На манифестацијата присуствуваа градоначалниците на општините Охрид, Дебрца и Поградец, Кирил Пецаков, Зоран Ногачески и Илир Џаколи, кои запловија со едрилица од Градското пристаниште до плажата „Кај Дивото“. На настанот не присуствуваше градоначалникот на Општина Струга Рамиз Мерко.
Тројцата градоначалници беа едногласни дека заштитата на езерото треба да остане приоритет за крајезерските општини.
Aктивната соработка меѓу Охрид, Струга и Дебрца од македонска и Поградец од албанска страна е започната пред неколку години, а според Пецаков, ја дефинира потребата за вложување на заеднички напори во поставување база за соработка, која ќе биде појдовна точка за напредокот во регионот на Охридското Езеро.
– И оваа година традиционално го прославуваме 21 јуни како Ден на Охридското езеро, со силна верба дека ќе направиме се за неговата заштита и промоција, како наше заедничко уникатно природно богатство, истакна Пецаков.
Со помош на Едриличарската федерација на Македонија и ЕУ, тој нагласи дека сакаат да ја покажат посветеноста на еколошкиот аспект, а охридските едрилици, според него, се патоказ како во иднина треба да изгледа нашиот бисер.
– Треба да направиме се, грижата за Охридското Езеро, како огромна природна вредност, да добие соодветна валоризација во заедничките напори и взаемната соработка за заштита и прогрес на езерскиот регион како географска целина, која има слични економски, социолошки и еколошки карактеристики, подвлече Пецаков.
Градоначалникот на Поградец забележа дека мора заеднички да менаџираат со езерото со апел за изнаоѓање решенија за слободно движење на граѓаните од двете страни на границата.
– Ние мора заеднички да менаџираме со езерото имајќи ги предвид туризмот, економијата и културните вредности. Сакам да упатам апел и до градоначалниците дека треба да изнајдеме начини за надминување на бирократијата за слободно движење на граѓаните од двете страни на границата. Сметам дека ова ќе помогне многу за развој на туризмот на двете страни. Ќе продолжиме да ја продлабочуваме соработката бидејќи ова езеро не спојува сите, рече Џаколи.
За Ногачески ова е уште еден момент за реафирмација на ставовите и заложбите, кои ги имаат изградено за обезбедување на максимална заштита на светското, природно и културно наследство во регионот на Охридското Езеро.
– Ова е заложба на сите кои сме вклучени во овој процес почнувајќи од општините од македонската страна, имаме одлична соработка не само во процесот на исполнување на сите препораки од УНЕСКО, исполнувањето на националните и меѓународни обврски во поглед на заштита на светското, природно и културно наследство и секако соработката која се одвива на планот на репрогласување на Охридското Езеро како споменик на природата. Таа соработка на неодамнешната средба во Тушемиште веќе ја префрламе и на билатерално ниво, значи целосна една заштита на регионот на Охридско Езеро е можна само со вклучување на сите засегнати чинители, посочи Ногачески.
Во рамките на одбележувањето на Денот на Охридското Езеро, Археолошки музеј на Република Северна Македонија во соработка со Универзитетот од Берн и музејот „д-р Никола Незлобински” во Струга одржуваат отворен ден за подводната археологија во Охридското-струшкиот регион. Присутните имаат можност да се запознаат со методологијата на работа при подводни археолошки истражувања, резултатите од истражувањата кои се во тек, како и дел од движниот археолошки материјал.
Програмата треба да продолжи вечер со солистички концерт на познатиот пијанист Алекандар Јаковлев во црквата Св. Софија во Охрид.
Извор: МИА
