На откупниот пункт во Сокотаб – Битола се носат кутии, се проценува тутунот, се одредуваат класи…откупот на тутунот од последната реколта е во тек.
Раководителот на ПЕ на министерството за земјоделство во Битола, Методија Илиевски неделава беше во посета на неколку откупни пунктови за лично да се увери како се одвива откупот на тутунот.
-Од ова што може да се види, но и од разговорите со тутунопроизводителите можеме да заклучиме дека годинава ќе ја одбележи одличен квалитет на тутун и задоволни производители од класата во која им се проценува. За Владата тоа ќе значи зголемен фонд за субвенции бидејќи субвенциит се покачени и тоа 80 денари за прва класа, 70 денари за килограм тутун за втора класа и сите други 60 денари за килограм, а денеска земјоделците ми кажуваат дека најмногу им се цени во прва и втора класа – изјави за Агротим, Илиевски.
Тутунопризводителите од битолските села Жабени и Долно Оризари кои имаа донесено тутун за проценка, велат дека добро поминале.
-Најмногу ни помина во прва и втора класа. Донесовме дел од производството од кое сме многу задоволни. Тутунот годинава има навистина одличен квалитет и монополите треба да го платат повеќе – велат земјоделците.
Раководителот Илиевски ги информираше тутунопроизводителите за новиот Закон за тутун, производи од тутун и сродни производи, а измените предвидуваат укинување на евидентните листови или т.н. „бели картони“, процес кој ќе започне да се применува од 2020 година. Со оваа законска одредба значајно ќе се намалат административните процедури за тутунарите.
